- Publika iha: 23 Março 2023
Diretora Nasional Kontrolu Moras, iha Ministerio Saude, Doutora Josefina Clarina Joao hateten ekipa mediku espesialista husi Brigada China no Cuba iha Hospital Nasional Guido Valdares (HNGV) halo konsulta espesialidade ba komunidade sira iha munisipiu Atauro.
Nia salienta atividade konsulta espesialista refere halao durante loron tolu hahu loron 8 ate 10 fulan fevereiru no pasiente sira mos bele asesu ba servisu radiologia nian hanesan hasai ran, X-Ray, no USG.
"Konsulta espesializadu sira hanesan ne'e, ita nia alvu primeiru mak area sira ne'ebe difisil asesu atu komunidade sira bele iha asesu ba servisu kuidadu espesialista," nia hateten bainhira partisipa iha atividade konsulta mediku jeral iha sentru Saude Munisipiu Atauro.
Nia hateten antes ne'e ekipa halo ona konsulta iha munisipiu Ermera, liu-liu suku sira ne'ebe difisil asesu ba fasilidade saude tanba kestau distansia no kondisaun estrada.
Iha parte seluk, Administrador Munisipiu Atauro, Domingos Soares hato'o hato'o agradese ba ministerio saude no parseiru Misaun Lepra iha Timor-Leste, ne'ebe lori ona ekipa medika espesialista fo atendimentu ba komunidade sira.
"Lori Atauro oan tomak nia naran hakarak hato'o Agradese Wain ba Ministerio Saude no NGO Misaun Lepra halo konsulta ba ita nia komunidade sira," nia hato'o.
Nia dehan programa konsulta jeral ne'e, diak tebes tanba parte ida bele fo tratamentu ba komunidade sira, bele mos halo rejista dadus problema saude ne'ebe komunidade sira enfrenta atu bele sai baze dadus ida ba sira atu halo melloramentu ba sistem saude iha nivel munisipiu.