- Publika iha: 18 Abril 2023
Sekretáriu Estadu Protesaun Sivíl, Joaquim Gusmão dos Reis Martins hateten Autoridade Protesaun Sivíl (APC) iha nivel nasionál to’o munisípiu preparadu iha parte rekursu umanu no fasilidade atu halo metigasaun no responde ba situasaun emerjénsia sira-ne’ebé akontese hodi protese vida umanu no redús estragu sira.
Nia salienta dezastre bo’ot ne’ebé akontese iha loron 4 fulan abril 2021, liuba autoridade protesaun sivíl hamutuk ho parseru sira halo atuasaun ne’ebé rápidu. Maibé nafatin halo esforsu atu fortalese mekanizmu servisu sira-ne’ebé estabelese ona iha nivel munisipál hodi bele halo metigasaun no responde di’ak liutan ba komunidade.
“Autoridade harii tan nia sistema no servisu sira tuun to’o munisípiu sira, entaun ita preparadu atu hasoru dezastre sira. Workshop ida ohin ne’e ita atu diskute kona-ba matadalan ida ba iha jestaun risku dezastre nian no regulamentu sira ba armajenamentu, ita bo’ot sira hatene ita sempre apoia ita-nia komunidade bainhira akontese dezastre ho sasan ne’ebé presiza iha munisípiu sira tau iha armajen,” nia hateten hafoin partisipa semináriu nasionál jestaun risku dezastre ba struktura APC husi 14 munisípiu, iha salaun City 8 Manleuana, Díli.
Nia dehan tinan ida-ne’e (2023) sei monta armajen temporáriu kontainer iha munisípiu hotu atu bele armajena sasan sira, liu-liu aihan sira atu ajuda komunidade tanba ne’e importante atu responsável sira iha koñesimentu no abilidade atu jere armajen ne’e.
Nia hateten governu mós fó tan tomada posse ba membru korpu-bombeirus na’in 96 atu koloka ba munisípiu tolu hanesan munisípiu Manatuto, Ermera no Liquiçá.
Nia hatutan tinan kotuk sosa ona karreta ba munisípiu sia no tinan ne’e sosa tan ba munisípiu lima ho diresaun nasionál no servisu operasionál sira iha nasionál atu halo servisu. No hetan apoia karreta espesífiku no auteskada hodi distribui ba munisípiu sira.
Nia haktuir dadaun ne’e sei iha difikuldade mak seidauk iha sentru evakuasaun ne’ebé permanente tanba durante ne’e servisu hamutuk de’it ho parseru sira institusaun igreja nian hanesan Dom Bosco, hodi fó fatin atu akumula vítima sira no uza mós espasu públiku hanesan eskola, sede suku.
Iha parte seluk, Xefe Ezekutivu Misaun IOM iha Timor-Leste, Ihma SHAREEF hateten desde tinan 2008, sira apoia ona governu iha servisu metigasaun no responde ba situasaun emerjénsia nian no kooperasaun ne’e sei kontinua nafatin.
“Agora ami-nia kooperasaun ho APC foku ba jestaun risku dezastre, ne’ebé nia foku ba liu hasa’e kapasidade ofisiál protesaun sivíl sira-nian atu responde ba dezastre no ami mós servisu iha setór protesaun, liu-liu violénsia bazeia ba jéneru iha situasaun dezastre,” nia hateten.
Nia hateten Timor-Leste iha mekanizmu koordenasaun emerjénsia ne’ebé ho sistema klaster, entaun IOM no ajénsia UN seluk inklui organizasaun seluk servisu iha lideransa APC nian atu halo metigasaun no responde ba situasaun emerjénsia sira.