- Publika iha: 26 Abril 2023
Diretór Jerál Sekretariadu Tékniku Administrasaun Eleitorál (STAE), Acilino Manuel Branco informa ba públiku katak eleisaun parlamentár tinan 2023, sei laiha sentru votasaun paralelu atu fasilita eleitór sira husi munisípiu seluk bele vota iha Díli tanba lei la autoriza.
Nia salienta iha eleisaun presidensiál tinan 2022, implementa sentru votasaun paralelu tanba lei eleisaun presidensiál autoriza. Iha eleisaun parlamentár ne’e preokupasaun ne’e mós tama iha pakote alterasaun dala lima ba lei númeru 6/2006, lei eleitorál parlamentu nasional, maibé proposta alterasaun ne’e hetan veta husi Prezidente Repúblika, José Ramos Horta.
“Ha’u husu ba iha públiku katak eleisaun agora mai ne’e ita sei la implementa sentru votasaun paralelu tanba balun hanoin iha eleisaun presidensiál implementa sentru votasaun paralelu tanba eleisaun presidnesiál iha lei rasik, bainhira eleisaun presidensiál hotu ona lei ne’e labele uza fali ba eleisaun parlamentár,” nia hateten iha edifisiu STAE Kaikoli, Díli.
Nia hateten ba orgaun komunikasaun sosiál, liu-liu jornalista sira mós iha lei eleitorál parlamentár nian artigu 37 la ko’alia kona-ba jornalista sira atu vota de’it iha sentru votasaun ne’ebé besik ba iha fatin sira hala’o knaar ba tanba ne’e jornalista sira hotu tenke fila fali ba sira nia suku bazeia ba kartaun eleitorál.
Nia hatutan lei hateten ajente administrasaun públika sira-ne’ebé hala’o knaar iha loron votasaun de’it mak bele vota iha sentru votasaun ne’ebé sira hala’o knaar ba, seluk tenke fila ba suku ida-ida atu tuir votasaun.
Iha parte seluk, Ministru Administrasaun Estatal (MAE), Miguel Pereira de Carvalho hateten governu esforsu halo alterasaun ba lei eleisaun parlamentár atu estabelese sentru votasaun paralelu atu fasilita eleitór hotu bele vota, lei ne’e hetan veta la passa.
Nia dehan esperiénsia iha eleisaun presidensiál tinan 2022, eleitór hamutuk 4,000 mak vota iha sentru votasaun paralelu.
“Ha’u apela ba ema hotu governu, partidu polítiku, sosiedade no eleitór ida-idak atu halo esforsu bele fila ba sira-nia fatin atu partisipa iha votasaun, liu-liu sira-ne’ebé mai iha ne’e eskola no halo atividade ekonomia,” nia hateten hafoin partisipa iha serimonia entrega tinta eleitorál iha salaun STAE Kaikoli, Díli.
Nia hateten iha pasadu partidu polítiku sira mak mobiliza sira-nia militante atu fila ba ida-ida nia suku hodi tuir votasaun, ba governu tenke kuidadu ho asaun sira-ne’e tanba governu la’ós entidade ne’ebé favorese ba militante partidu polítiku sira.
Nia hatutan laiha sentru paralelu tanba lei eleisaun parlamentár autoriza de’it eleitór vota iha nia suku rasik, maibé governu aumenta sentru votasaun no estasaun votu iha rai-laran no rai-liur, hanesan sentru votasaun husi 1,200 sa’e ba 1,500 no estasaun votu husi 1,500 sa’e ba 1,900 atu hasa’e taxa partisipasaun.