- Publika iha: 02 Outubro 2023
Vise-Ministru Saúde asuntu Operasionalizasaun Hospitais, Doutor Flávio Brandão hateten materiál konstrusaun ba Unidade de Pediatra e de Cuidados Coronários Intensivos do Hospital Nacional Guido Valadares (HNGV), maioria importa husi China, tanba ne’e lori tempu kleur.
Nia dehan lansamentu fatuk dahuluk hala’o iha fulan janeiru tinan 2023, konstrusaun fíziku hahú fulan setembru tanba airin importa husi China.
“Ita orgullu tanba ohin ita hotu iha ne’e rona aprezentasaun ruma no ita konsegue tau airin ba rai, ne’e hatudu ita-nia komitmentu atu harii hospital pediatria ho modernu andar lima,” nia hateten hafoin partisipa iha serimónia hatuur airin konstrusaun unidade pedatria HNGV, Díli.
Nia hateten projetu ne’e finansia tomak husi governu, liuhusi Konsellu Administrasaun Fundu Infrastruktura (KAFI) ho montante $9,341,663.70, ne’ebé alokasaun kada tinan.
Nia hatutan projetu ne’e bo’ot, entaun prosesu aprovizionamentu hala’o husi Komisaun Nasionál Aprovisionamentu (CNA).
Nia informa projetu ne’e ho durasaun to’o tinan 2025, entaun iha fulan Marsu tinan 2025, iha ona unidadepedatria hodi fó asisténsia saúde ba labarik sira.
Iha parte seluk, Xefe Enjeñeiru, husi Kompaña China Civil Engineering Construction Corporation Timor, Lda hateten sira garante projetu ne’e sei finaliza iha tempu ne’ebé determina ona iha kontratu katak marsu 2025.
Nia rekoñese maioria materiál hatama husi China no promete sei konklui projetu ne’e to’o fulan marsu tinan 2025.
“Maioria materiál konstrusaun ami husi China, maibé iha mós materiál balun husi Indonesia no rai-laran rasik,” nia hateten.
Nia hateten agora dadaun joven timoroan sira-nain 10 mak servisu ona, maibé bainhira servisu barak no eziji tempu mak sira sei loke tan oportunidade ba joven sira, tanba presiza traballadór barak entre 60 até 70.