- Publika iha: 09 Outubro 2023
Presidente Assosiasaun Feto Munisípiu Dili (AFEMDIL), Maria Fatima Amorin Pereira informa katak sira identifika ona feto pontensial na’in 50, kompostu husi 13 kandidata aan ba xefe suku maioria kandidata ba xefe aldeia, ne’ebé preparadu atu kompete iha elisaun suku periodu tinan 2023-2030.
Nia dehan iha elisaun anterior, identifika feto na’in 26 mak kompete ho mane sira iha 35 sukus. Maibe ikus mai nain tolu eleitu ba xefe suku mak xefe suku Kampung Alor, xefe suku Bemori no xefe suku nain feto.
“Ita nia kandidata sira ne’ebé AFEMDIL identifika ona durante ne’e hamutuk 50 ne’ebé ita prepara sira hahu husi sensibilizasaun no kontinua ba formasaun atu nune’e sira bele iha koñesementu no preparativu ruma oinsa sai liderasa,” nia hateten iha ámbitu sosializasaun no formasaun ba partisipasaun feto iha vida politika no feto iha lideransa lokal ba elisaun suku iha munisípiu Dili periodu 2023-2030, iha Tower Fatuhada, Dili.
Nia hateten dadaun ne’e kandidata sira seidauk hetan formulario tanba ne’e husu xefe suku aktual atu hare kestaun ne’e hodi sensibiliza no fasilita kandidata sira iha prosesu tomak.
Nia hatutan prinsipiu demokrasia, signifika fo oportunidade no biban mos ba feto sira atu hamrik ho mane sira hamutuk kontribui ba dezenvolvimentu nasaun nian.
Entretantu, kandidata xefe suku Lahane Oriental, Celia Lopes da Silva hateten kondisaun moris komunidade nian motiva nia kompete iha elisaun suku periodu 2023-2030, tanba hakarak kontribui dezenvolve suku hodi fo moris ne’ebé dignu ba povu.
Nia dehan situasuan aktual ne’ebé komunidade enfrenta mak problema infrastrutura bazika, liu-liu laiha asesu ba bee moos.
“Hau hakarak dezenvolve hau nia suku Lahane Orietal hodi atinji objetivu dezenvolvimentu sustentavel. Atu atinji ida ne’e hau nia programa prioridade mak infrastrutura, saúde no edukasaun,” nia hateten.
Iha parte seluk, Presidente Autoridade Munisipiu Dili, Guilhermina Filomena Saldanha Ribeiro hateten kontente rona feto maluk barak mak hakarak kompete iha elisaun suku periodu 2023-2030.
“Husu ba kandidu sira tenke atensaun ba rekejitus sira, hau hanoin ita bo’ot sira prepara aan longa data, labele fali to’o ikus hare fali rekejitus ida ne’e laiha inklui fotografia ne’e, labele tau fotografia ida uluk sei joven, maibe ida aktual,” nia hateten.
Nia hateten munisípiu Dili iha suku hamutuk 35 no aldeia 227, entau espera suku no aldeia barak mak sei lidera husi feto sira hodi kontribui organiza sidade Dili sai nabilan no furak liu tan ba oin.