Segunda, Junho 24, 2024
Total visitors: 766366

Ministériu Admistrasaun Estatal (MAE) hetan apoiu husi Programa Nasoens Unidas ba Dezenvolvimentu (UNDP) no governu Japaun hodi implementa projetu komunitária hamutuk unidade 40 ba munisípiu 4 iha Bobonaro, Ermera, Liquiçá no Oe-Cusse.

Ministériu Admistrasaun Estatal (MAE) hetan apoiu husi Programa Nasoens Unidas ba Dezenvolvimentu (UNDP) no governu Japaun hodi implementa projetu komunitária hamutuk unidade 40 ba munisípiu 4.

Ministru MAE, Tomas Cabral, dehan projetu komunitária ne’e aliña tebes ho programa governu da-sia nian, kona-ba asesu infraestrutua bázika hanesan, saúde, edukasaun, merkadu, irigasaun, bee no saneamentu ba komunidade.

Nia dehan, projetu ne’e komunidade mak sei sai na’in, no implementa husi UNDP no komunidade iha munisípu 4 ne’e mak sai benefisiáriu.

“Ha’u lori Governu no Estadu Timor-Leste nia naran hato’o agradese ba UNDP no Governu Japaun, tanba durante ne’e sempre apoiu dezenvolvimentu nasional iha rai-laran,” Ministru MAE Cabral dehan.

Iha fatin hanesan, Reprezentante Residente UNDP iha Timor-Leste, Katyna Argueta, dehan implementasaun projetu ne’e ho objetivu atu apoiu komunidade iha munisípiu Bobonaro, Ermera, Liquiçá no Oe-Cusse hodi harii no reabilita insfraestrutura komunitária hamutuk unidade 40 hodi fasilita komunidade.

“Infraestrutura ne’ebé ita konstrui no reabilita ne’e kompostu husi saúde, edukasaun, merkadu, irigasaun, bee moos no saneamentu ba komunidade benefisiáriu sira,” nia dehan iha Edifísiu MAE, iha Kolmera, Díli.

Enkuantu nia dehan, projetu ne’e kria empregu kurtu prazu ba komunidade liuhusi envolvimentu mão de obra kualifikadu durante prosesu konstrusaun.

“Total orsamentu ne’ebé UNDP oferese ba projetu ne’e hamutuk $300,000. Ita-nia esperansa ba intervensaun ne’e bele rezulta mellora povu nia kualidade moris iha área projetu,” nia esperansa.

Entretantu, Embaxadór Japaun iha Timor-Leste, Kimura Tetsuya, dehan projetu ne’e aliña ho konseitu “seguransa umana” ne’ene Japaun fó importansia tebes, nune’e mós projetu ne’e foka ba protesaun, kapasitasaun, inkliu saúde, edukasaun, bee moos saneamentu merkadu no irigasaun.

“Total orsamentu ne’e mak governu Japaun oferese hamutuk millaun $4.8,” Embaxadór Tetsuya dehan.

Enkauntu projetu komunitária ne’e nia durasaun implementasaun durante tinan 4 hahu husi 2023 to’o 2027.