- Publika iha: 27 Outubro 2023
Ministru Ministeriu Agrikultura, Pecuária, Pesca no Florestas (MAPPF), Marcos da Cruz informa governu lansa tan fini husi aihoris haat ho variedade 10 inklui fini batar hibrida variedade rua, ne’ebé atu distribui ba produtór fini sira atu habarak fini ne’e hodi apoia ba agrikultór sira.
Nia dehan aihoris haat ne’e mak batar hibrida variedade rua, hare mean variedade ida, duhaen variedade ida, koto badak iha variedade haat mak biaciara, suhurama, ariana no erafa.
“Iha tinan 2015, ita lansa ona variedade 19 hanesan aifarina, batar, fehuk, koto no hare nakroma agora dezenvolve ona iha rai-laran, tanba ne’e ita ladun ona importa fini husi rai-liur. Ita lansa tan variedade fini variedade 10, ne’ebé ikus mai ita bele dezenvolve ona iha ita-nia rai hodi nune’e ita fó ba ita-nia agrikultór sira kuda iha sira-nia natar no toos atu aumenta produsaun fó han ba ita-nia populasaun,” nia hateten bainhira partisipa iha semináriu internasionál sentífiku kona-ba ai-horis kandidatu variedade no teknolojia foun, iha salaun Paroquial São José Catedral Vila-Verde, Díli.
Nia konsente atu aumenta produsaun rai-laran, fini ne’ebé ho karakterístiku di’ak. Maibé la’ós fini de’it, iha mós komponente seluk hanesan kapasidade no abilidade agrikultór sira-nian atu implementa fini ne’e nomós apoia ekipamentu inklui infrastrutura.
“Aumenta produsaun ita presiza ema matenek, liu-liu peskizadór atu halo peskiza nafatin no ema ne’ebé implementa ita-nia produtu. Peskiza ne’e rasik hanesan estensionista sira tenke komprende oinsa atu dezenvolve fini sira-ne’e iha tereinu no agrikultór sira-nia koñesimentu tenke aumenta. Depois apoia sira seluk presiza dezenvolve infrastrutura irigasaun, fasilidade tratór sira no konservasaun floresta atu prezerva bee matan sira. Tanba ne’e la’ós fini di’ak autormatikamente produsaun aumenta,” nia hatutan.
Ministru hatutan tinan 2024, governu sei investe makas iha peskiza, liu-liu kapasitasaun ba peskizadór sira atu hasa’e sira-nia kapasidade no abilidade peskiza ba fini hare hibrida, tanba seidauk iha peskizadór espesialidade ba hare nian.
Iha parte seluk, Peskizadór, Celestino Luis Moreira hateten peskiza ba ai-horis haat ne’e ho durasaun tempu ne’ebé la hanesan kuaze tinan 4 até 10, liu-liu batar hibrida ne’e tinan 10 resin.
“Kuandu ita la prodús fini hibrida iha ita-nia rai rasik, mak governu tenke tau osan tinan-tinan sosa fini husi rai-liur. Ho maneira ne’e mak ita redús dependénsia fini, tanba durante ne’e ita la’ós dependénsia de’it ba ai-han, maibé fini mós, tanba tinan 10 liuba dependénsia fini husi rai liur 80%. Maibé depois liuhusi peskiza ita konsege prodús ona fini variedade 19 aumenta tan ho fini ai-horis haat ho variedade 10 ne’e mak ita iha ona fini variedade 29, signifika ita redús ona dependénsia fini,” nia hateten.
Nia dehan parental fini hibrida ne’e peskizadór kaer ona, tanba ne’e bele entrega ba produtór fini sira hodi habelar atu distribui ba agrikultór sira kuda atu aumenta produsaun, tanba fini sira-ne’e nia karaterístiku moris ho ambiente Timor-Leste nian.
Nia hatutan fini batar hibrida variedade rua ne’e bele dezenvolve iha teritóriu nasionál, tanba ne’e bainhira produtór fini habarak ona sei fahe ba agrikultór sira hotu kuda.