- Publika iha: 24 Maio 2024
Xefe Suku Fahinehan, Postu Administrativu Fatuberliu, Munisipio Manufahi, Eugenio Manuel Araujo Costa Amaral hateten, Timor-Leste ukun an tinan 20 resin ona, maibé komunidade suku Fahinehan seidauk sente dezenvolvimentu.
Nia dehan, komunidade suku Fahinehan sira hela de'it iha área rurál estrada mós aat No. ponte la iha, entaun iha tempu udan komunidade sira labele asesu ba merkadu, tanba mota boot liu la di'ak.
“Ami-nia estrada diresaun Fahinehan, Bubususu, Turiskain no Same, komesa tempu Indonesia to’o Timor-Leste ukun an ne’e, seidauk iha governu ida mak atu mai haree hodi tau matan. Kada tinan komunidade iha suku ne’e labele lori sira-nia produtu ba fa'an iha merkadu bainhira udan boot, tanba udan boot mota tun ita labele liu,” nia dehan liuhusi telefone.
Nia hatutan, Timor-Leste ne’e ukun an kleur ona, maibé suku Fahinehan nafatin moris iha difikuldade nia laran, tanba kondisaun estrada ne’ebé ho kondisaun aat iha tempu okupasaun até agora seidauk hetan reabilitasaun husi governu Timor-Leste.
Nia husu ba ba Governu liuliuu ministériu relevante atu tau matan netik ba sira-nia estrada diresaun Fahinehan, Bubususu, Turiskain, Same no ponte sira ne’ebé aat kleur ona, atu nune’e komunidade sira husi suku ne’e bele lori sira-nia produtu lokál ba faan iha merkadu, tanba komunidade sira ne’e maioria moris de'it ho agrikultór.
Iha parte seluk komunidade Suku Fahinehan, Crisogno Xavier de Andrade hateten, sira durante ne’e preokupa loos ho kondisaun estrada ne’ebé aat durante tinan naruk, bainhira sira atu halo viajen ba mai la di'ak iha tempu udan.
“Ami durante ne’e susar atu hodi produtu lokál ba faan iha merkadu, tanba ami nia estrada ne’e aat kedas durante Indonesia nia tempu to agora. Bainhira ami tempu udan hanesan ne’e ami la bele la'o tanba tahu no mota boot, entaun ami labele hodi produtu ami nian ba fa'an iha merkadu,” nia dehan.
Nia haktuir, dala ruma sira obriga an lori produtu ba fa'an iha merkadu, maski udan boot, entaun sira halibur barak tiha mak sira ba hamutuk, atu nune’e ba haree mota boot, entaun sira tenke hulan lisuk motór ba mota sorin, maibé dala ruma mota boot liu sira obriga an tama, dala ruma motór mota lori, sira lakohi atu ba maibé ida ne’e nesesidade mak obriga sira tenke ba.
Nia husu ba governu atu tau matan netik ba sira.