- Publika iha: 29 Maio 2024
Sekretario Sekretária Estadu Protesaun Sivíl (SEPS), Domingos Mariano Reis hateten, lansamentu ba projetu asaun antisipatóriu atu oinsá halo preparasaun hodi hasoru el-niñu, tanba durante ne’e la iha preparasaun ida oinsá atu bele hasoru el- niñu ka bailoron naruk.
“Saida mak ita tenke halo mak konserva ita-nia bee matan sira, prepara fini ba agrikultór sira hodi konserva ai-han hodi bele garantia katak kuandu bainhira el-niñu ka bailoron naruk ita-nia komunidade sei la kontesta kona-ba hamlaha, sei la kontesta kona-ba bee. Tanba ida ne’e mak ita-nia preparasaun ba el-niñu,” nia dehan hafoin remata lansamentu ba projetu asaun antisipatóriu el-ninu iha salaun APC, iha Kaikoli, Díli.
Nia dehan, iha preparasaun ba el-niñu, sei benefísiu ba komunidade uma-kain na’in 400, nomós sei oferese bee moos ba komunidade sira-ne’e, no asaun antisipatóriu maizumenus populasaun na’in 6000 iha munisípiu 11.
Iha parte seluk, Reprezentante Disaster READY Country Committee, nudar mos Country Director ONG internasional Caritas Australia nian Fernando Pires, hateten preparasaun ba hasoru el-niñu ne’e sei kontinua ba tinan ida hodi haree ba dezastre ne’ebé sei akontese, tanba ne’e liuhusi kooperasaun ho APC no ajuda husi governu Australia sei bele kontinua nafatin ba oin.
“Projetu asaun antisipatóriu ba el- niñu ida-ne’e atu oinsá bele haree ba problema bailoron naruk, atu nune’e bele foti medidas de mitigasaun para bele aumenta referénsia, no projetu ida ne’e mai husi ONG na'in lima mak hanesan Care, Caritas Australia, Oxfam, Plan, no World Vision,” nia dehan.
Nia salienta, projetu refere kobre husi parseiru lokál sira no autoridade lokál, hodi foti medida hotu atu oinsá atu bele fó benefísiu másimu ba komunidade sira, nune’e komunidade sira mak sai na'in ba projetu ne’e, tanba efeitu mudansa klimátika komunidade sira mak iha oin, entaun liuhusi projetu ne’e bele haforsa sira atu sira bele foti medidas ne’ebé sira deside rasik hodi tahan netik problema sira ne’ebé mak komunidade sira hasoru.