Segunda, Junho 24, 2024
Total visitors: 766366

Koordenadór Sekretariadu Tékniku Timor-Leste Coalition for Education (TLCE), Jose Monteiro, dehan durante fulan janeiru to'o abril 2024, iha eskola 18 mak hetan estagus tanba kauza husi dezastre naturais.

Koordenadór Sekretariadu Tékniku Timor-Leste Coalition for Education (TLCE), Jose Monteiro, dehan durante fulan janeiru to'o abril 2024, iha eskola 18 mak hetan estragus.

Nia dehan, tuir monitorizasaun ne’ebé sira halo katak, eskola hamutuk 18 ne’ebé hetan estragus ne'e iha munisípiu lima, Manufahi, Baucau, Liquiçá, Bobonaro, no Ainaro.

"Ita espera katak Ministériu Edukasaun bele foti hotu ona dadus husi eskola hirak ne'e atu bele halo prosesu konstrusaun iha tempu badak," nia hatete.

Tanba ne'e nia dehan, ministériu tenke halo atendimentu ho emerjénsia hodi rezolve problema eskola hirak ne’ebé mak estragus.

"Ita-nia estudante sira presiza tur iha fatin ne’ebé mak dignu no seguru, hodi tuir prosesu aprendisajen,tanba dadaun ne'e iha munisípiu sira tempu udan," TLCE Monteiro dehan.

Alende ne'e eskola ne’ebé hetan estragus tuir lista ne’ebé sira asesu kompostu husi pre-eskolar 3 no ensinu báziku 15.

Entretantu, portavoz Ministériu Edukasaun, Felipe Rodriges Pereira, dehan eskola 18 ne’ebé mak hetan estragus ne'e husi ministériu hetan ona pedidu 8 no halo ona distrubuisaun material konstrusaun.

"Ita-nia ekipa sei ba halo fali monitorizasaun atu bele hatene konstrusaun lao ona ka seidauk no haree mós kona-ba material sira," nia hateten.

Enkuantu material konstrusaun ne’ebé mak ministériu distribui ne'e kompostu husi pregu, kalen, besi, ai, no material konstrusaun seluk tan ne’ebé presiza.

Enkuantu ministériu hein nafatin pedidu husi parte eskola ne’ebé mak hetan estragus no husi munisípiu nia proposta hodi bele distribui material konstrusaun ba eskola hirak ne’ebé mak seidauk hato'o proposta.