- Publika iha: 16 Outubro 2024
Governu Koreia apoiu Timor-Leste liuhusi Projetu Hadala ne’ebé haree liuba setór agrikultura, tanba setór refere bele ajuda tebes Timor-Leste iha dezenvolvimenu.
Embaxadór Koreia Shin Man-Taek hateten, Governu Koreia apoiu másimu setór agrikultura iha Timor-Leste liuhusi Projetu Hadala.
“Projetu Hadala hanesan projetu ida ne’ebé maka hetan apoiu másimu husi governu Koreia no apoiu sira-ne’e hahú kedas husi Timor-Leste ukun aan, hanesan programa sira ne’ebé implementa iha munisípiu Lauten no munisípiu sira seluk, hodi nune’e bele dezenvolve nasaun ida-ne’e liuhusi setór agrikultura,” dehan Embaxadór Koreia Shin Man-Taek.
Nia hatutan, dadaun ne’e implementa tan projetu Hadala iha munisípiu sira hodi nune’e bele hasa’e abilidade agrikultór sira-nia hodi kontribui ba dezenvolvimentu.
“Projetu hadala hanesan projetu ida ne’ebé implementa iha munisípiu tolu (3) hanesan, Aileu, Ainaro no Liquiçá hodi mellora liutan agrikultór sira-nia abilidade atu kontribui ba dezenvolvimentu setór agrikultór ne’e rasik, alende ida-ne’e investe mós orsamentu hamutuk kuaze 22 mil dolar amerikanu ne’ebé apoiu nomós fahe kapasitasaun esperiénsia no abilidade”, Tenik nia.
Iha fatin hanesan reprezentante Vise-Primeiru-Ministru no Ministru Koordenadór ba Asuntu Sosiál, Chistopher Samsung hatutan, Vise-Primeiru-Ministru agradese tebes ba projetu ne’ebé implementa husi Governu Koreia, tanba bele ajuda komunidade sira.
“Vise-Primeiru-Ministru agradese tebes ba implementasaun projetu hadala, tanba bele ajuda tebes komunidade sira iha Aileu, Ainaro no Liquiçá tanba projetu ne’e rasik família atus rua (200) hetan ona benefisiu direta no agradese tebes ba KOICA bele fahe ona esperiénsia ne’ebé iha valór ba komunidade sira,” hatutan nia.
Nia dehan, Vise-Primeiru-Ministru nafatin fó suporta ba projetu hadala, tanba projetu ida ne’ebé ajuda tebes komunidade sira iha área agrikultura.
“Vise-Primeiru-Ministru suporta tebes projetu hadala nian tanba projetu ida ne’ebé ajuda tebes komunidade hodi hadia moris no bele hasae sira nia koñesimentu di’ak liutan iha setór agrikultór nian,” Tenik nia.