- Publika iha: 16 Outubro 2024
Forum Organizasaun Naun-Governamental Timor-Leste (FONGTIL) husu governu no Igreza tenke promove Tasi-Tolu sai sentru turizmu, no sai sítiu istória ba vizita Santo Padre.
Diretór Ezekutivu FONGTIL Valente da Costa Pinto dehan, governu gasta ona osan barak hodi halo konstrusaun ba fatin Tasi-Tolu hodi prepara ba misa ne’ebé prezide husi Santu Padre Francisco, tanba ne'e tenke tau atensaun.
Nia dehan, fatin ne'e misa hotu, labele abandona de’it hanesan Uma Adat ne’ebé mak uluk konstui iha momentu vizita Santu Padre São Paulo Segundu nian.
"Husu Governu no Igreza tenke promove Tasi-Tolu sai hanesan sentru turizmu no sítiu istóriku, nune'e bele sai lisaun di’ak ba Timor-Leste no iha mundu," Diretór Ezekutivu FONGTIL Pinto dehan.
Nia dehan, Tasi-Tolu ne'e Governu tenke tau-matan, tanba ne'e fatin sagradu, governu tenke iha planu hodi halo kontrolu depois de Santu Padre fila.
"Ita tenke asegura no konserva atu nune'e bele utilize iha serimónia bo'ot sira ne’ebé ita-nia Igreza sira halo nune'e mós sai hanesan fatin konsentrasaun ba sarani sira iha Timor-Leste," nia salienta.
Entretantu Reprezentante Vatikanu iha Timor-Leste Nuncio Apostóliku Marco Sprizzi hatete, konstrusaun altar misa iha Tasi-Tolu ne'e reprezenta kultura Timor-Leste nian no reliziaun Katólika nian no fatin ne'e sagradu.
"Depois de misa fatin altar Tasi-Tolu ne'e sei promove ba turizmu no museum aberta ba ema hotu, tanba ne’e tenke kuidadu no respeita, tanba fatin ne’e halulik no sai sagradu ona," nia informa.
Nia hatutan, Governu no Igreza iha ona planu atu tau fatin Tasi-Tolu sai muzeum no sai fatin memoria ba bensaun husi vizita Santu Padre nian.
Enkuantu konstrusaun ba altar Tasi Tolu ne'e gasta osan ho montante $ miliaun 1 no konstrui husi emprezaria Timoroan Karia Timor ho medida diamentru 50, altar ho metru 17×35 kompleta ho toilet ba VIP.