- Publika iha: 16 Outubro 2024
Konstrusaun infraestrutura eskolár tinan (2024) ne'e foka liuba área haat (4) mak hanesan saladeaula, haris-fatin, instalasaun bee moos no eskritóriu ba profesór sira.
Direitór Diresaun Nasionál Infransturtura no Edukativu iha Ministériu Edukasaun, Helio Lopes hatete, projetu konstrusaun ba infraestrutura eskolár iha tinan ne'e fó prioridade liuba iha área haat ne'e, tanba identifika ona katak sei sai problema.
Tanba ne'e nia dehan, projetu konstrusaun infraestrutura eskolár ne’ebé mak realiza iha tinan ne'e hamutuk 123 husi projetu hirak ne'e foka liuba parte importante sira.
"Ita foka liu saladeaula, haris-fatin, instalasaun be'e moos no eskritóriu ba profesór no ba fasilidade sira seluk hanesan morru eskolár ida-ne'e sei tau ba orsamentu tinan oin," nia dehan.
Tanba ne'e nia dehan, konstrusaun ba moru ne'e depois de konstrusaun ba edifísiu eskolár finaliza tiha mak halo moru nune'e bele fó protesaun ba eskola.
"Ita halu uluk mak saladeaula, tanba iha eskola barak mak presiza tebes saladeaula, haris-fatin, no be'e moos," Diretór Diresaun Nasionál Rekursu Umanu Lopes hatete.
Tanba nia dehan, dadaun ne'e tenke kria uluk kondisaun ba estudante sira hodi partisipa ensinu aprendisajen ho seguru.
Entretantu Koordenadór Rede Edukasaun Timor-Leste Coalition for Education TLCE Jose Monteiro dehan, área hirak ne’ebé mak Ministériu Edukasaun fó uluk prioridade iha konstrusaun tinan ida -ne'e tuir TLCE nian haree ne'e importante tebes hodi responde uluk.
"Ita haree iha eskola barak saladeaula la sufsiente, balun saladeaula sufsiente bee moos la iha balun mós saladeaula no bee moos la iha hotu," nia dehan.
Tanba ne'e TLCE apoiu polítika ne’ebé Ministériu Edukasaun iha liu-liu kona-ba konstrusaun infraestrutura eskolár nian, no husu atu rezolve ho sériu no gasta osan bo'ot tenke halo kontrusaun ne’ebé mak kualidade.