- Publika iha: 29 Outubro 2024
Departamento de Comunicação Social (DCS) Faculdade de Ciências Sociais (UNTL) tinan-tinan realiza atividade espozisaun hodi aplika obra sira-ne’ebé estudante sira halo durante hetan siénsia no pratika iha prosesu aprendisajen nia laran.
Diretór Departamento de Comunicação Social UNTL Roberto da Costa Pacheco hateten, DCS kada tinan sempre realiza atividade espozisaun ho objetivu atu hasae abilidade estudante sira-nian liuhusi siénsia ne’ebé-sira aprende no prátika.
“Departamento de Comunicação Social kada tinan estudante sira sempre realiza atividade espozisaun ho objetivu atu aplika estudante sira-nia abilidade liuliu ba iha matéria prátika sira hanesan foto jornalismu, jornal parede, dezeñu gráfiku no video.
Liuhusi espozisaun ne’e maka ita bele hatene kona-ba estudante sira-nia koñesimentu durante aprende iha aula-laran ne’e rasik,” dehan Diretór DCS-UNTL Roberto da Costa ba Jornalista TDW iha Kampus Kaikoli, Díli.
Diretór DCS dehan, atividade espozisaun ne’ebé sira realiza fó benefisiu ba estudante sira liuhusi obra sira bele aumenta koñesimentu no abilidade, tanba iha sesaun sira fahe mós esperiénsia husi oradór importante sira-ne’ebé espesifiku ba área Komunikasaun Sosial nian.
“Espozisaun ne’e ami fó fiar ba estudante sira maka organiza, estrutura departamentu no dosente ba matéria espesífiku sira akompaña sira-nia preparasaun sira to’o realiza. Bainhira atividade hotu sira aprezenta relatóriu atividade nian ba departamentu hodi aaprova no arkiva,” dehan Diretór.
Diretór hatutan, espozisaun ne’e atu aplika estudante sira-nia kreatividade ne’ebé durante sira prátika iha sala-laran ho dosente sira no iha atividade ne’e fahe mós esperiénsia husi oradór sira.
“Espozisaun ne’e rasik iha obra sira-ne’ebé estudante sira hatudu sei koordena mós ho fakuldade hodi bele taka mós ba parede sira iha sala-laran hodi nune’e halo furak liutan saladeaula sira no ita bele haree mós ninia artistiku,” Tenik nia.
Iha sorin seluk estudante DCS nian Zefriana Amaral hateten, atividade espozisaun ne’e hanesan atividade foun ba sira, tanba hanesan estudante ne’ebé tama iha UNTL iha tinan 2024 no liuhusi ida-ne’e sira sente hanesan esperiénsia foun ba sira.
“Atividade espozisaun ne’e hanesan atividade ida-ne’ebé di’ak tebes no foun ba ami, hanesan estudante ne’ebé foin tama UNTL iha tinan 2024 no liuhusi atividade ne’e ami bele hetan esperiensia foun sira-ne’ebé fahe husi oradór sira no hatene oinsa organiza atividade boot sira,” dehan estudante Zefriana Amaral.
Nia hatutan, liuhusi atividade refere nia sente kontente tebes, tanba bele loke ona hanoin oinsá atu sai ema ne’ebé professional ba iha futruru.
“Espozisaun ne’e ba ami hanesan buat foun, tanba ne’e ami orgullu tebes no liuhusi obra sira-ne’ebé iha bele loke mós ami-nia hanoin atu hili área ida-ne’ebé sai espesífiku no esforsu atu sai ema professional iha futuru, aleinde ne’e kontenti tebes bele tama iha departamentu komunikasaun sosial-UTNL,” Tenik nia.