- Publika iha: 30 Outubro 2024
Programa projetu komunitáriu ne’ebé mak mak realiza iha tinan 2021 hodi halo konstrusaun foun ba eskola 202 ne'e iha eskola 14 mak seidauk finaliza nia konstrusaun.
Diretór Diresaun Nasionál Infraestrutura no Edukativu iha Ministériu Edukasaun (ME), Hélio Lopes, hatete, projetu komunitáriu ba konstrusaun eskola foun iha 2021 ne'e hamutuk 202, no eskola 188 mak finaliza ona iha tinan 2022-2023 no hela 14 seidauk finaliza.
"Iha eskola 14 mak seidauk finaliza nia konstrusaun tanba atraju tanba kestaun dalan no servisu abandona husi badae, maibé dadaun ne'e atinji ona 90% signifika projetu komunitáriu 14 ne'e ita sei finaliza iha tinan ida ne’e," nia hateten.
Nia dehan, progresu fiziku falta 10% hein hadia laran de’it hodi prense karteira eskolár depois kompaña entrega ba Ministériu Edukasaun no ba parte eskola hodi utiliza.
"Tinan ida-ne'e finaliza no ita hein uza de’it ona," Diretór Diresaun Nasionál Infraestrutura no Edukativu iha Ministériu Edukasaun (ME), Lopes dehan.
Enkuantu eskola 14 ne’ebé seidauk finaliza ne'e lokaliza iha Munisípiu Baucau, Viqueque, Ainaro, Bobonaro no Manufahi.
Entretantu Diretór Servisu Edukasaun Munisípiu Ainaro, Patrício da Costa Magno, dehan, eskola ne’ebé tama ba projetu komunitáriu iha tinan 2021 hodi halo konstrusaun foun ne'e iha Munisípiu Ainaro hamutuk 9 husi ne'e eskola 5 sei entrega ba Ministériu Edukasaun iha fulan Outubru ne'e 4 mak seidauk finaliza.
"Eskola (5) fixu ona finaliza no entrega iha fulan Outubru ne'e ba Ministériu Edukasaun atu bele utiliza," nia salienta.
Nia dehan, eskola 5 ne’ebé mak finaliza ona konstrusaun iha fulan Outubru ne'e mak hanesan, Ensinu Pre-eskolár, Ensinu Báziku Filial Montanhas, Pre-eskolár Casa, EBF 1,2,3 Luru no EBF 1,2 Pader.
Nia dehan, konstrusaun eskola ne'e hahú iha Janeiru 2024 ho nia kustu ba obra konstrusaun ne'e depende ba kondisaun mak hanesan sala tolu (3) ne'e ninia kustu $80.000, enkuantu sala tolu (3) inklui ho haris-fatin ne'e kustu hamutuk $100.000-resin.
Enkuantu projetu konstrusaun eskola foun sia (9) ne'ebé konstrui ne'e mak hanesan pre-eskolár rua (2) no restante ne'e eskola ensinu báziku.