- Publika iha: 22 Janeiro 2025
Governu Xina sei konstrui Ospitál Militár ho tipu modernu no andar 8, iha Kuartél Jenerál Fatuhada nia kotuk, hodi fasilita militár sira halo tratamentu saúde iha ne'ebá.

Ministru Defeza Kontra-Almirante Donaciano da Costa Gomes "Pedro Klamar Fuik" dehan, Ospitál Militár ne’e hetan doasaun husi Governu Xina ba Falintil Forsa Defesa Timor-Leste (F-FDTL).
"Ospitál Militár ne’e konstrui ho tipu modernu no andar ualu (8) sei kompleta ho kama atus ida (100) no fasilidade tratamentu modernu sira seluk ne'ebé atu fasilita pesoál saúde sira halo tratamentu ba militár sira-nia saúde banhira moras," nia hatete.
Nia hatete, ospitál militár ne'e modernu ho andar ualu (8) ho kama atus ida (100), sala-emerjénsia própriu no sala-internamentu própriu ba VIP no ba pasiente normais sira.
"Ha’u atu dehan katak, Ospital Militár tuir planu halo atendimentu ba kualker moras no espesífiku ne'ebé identifika ona mak moras onkologia, Neurologia no própriu kurasaun no moras sira seluk ne'ebé mak identifika moras iha Timor-Leste," nia informa.
Nia dehan, kona-ba médiku no espesialista sira, sei iha faze final ba preparasaun haree Komisaun Instaladora ba projetu harii Ospitál Militár no kolokasaun pesoál saúde sira.
Entretantu Diretór Ezekutivu Fundasaun Mahein (FM) Nelson Belo dehen, Ospitál Militár ne’e di’ak hodi ajuda tratamentu ne'ebé dignu ba militár.
"Ita lakohi akontese, tanba hanesan kazu sira ne’ebé liu ona, militár barak mak mate iha emerjénsia, tanba de'it hetan tratamentu ladi'ak, akotesimentu sira-ne’e la'ós militár de'it, maibé komunidade barak," nia dehan.
Nia hatete, espera katak ho ezisténsia Ospitál Militár ne’e sei halo tratamentu ne'ebé dignu ba militár sira no sira-nia família nune'e mós ba públiku.