Pinto: Prontu Hatutan Servisu Husi PDHJ Tuan

Hafoin eleitu sai provedor foun ba instituisaun Provedoria Direitus Humanus no Justisa (PDHJ) Silverio Pinto, hateten prontu atu kontinua planu estratejiku ne’ebe trasa ona ba tinan 10 (2011-2020).

Nia hateten, planu ne’ebe agora atu haforsa liu tan mak, planu estrategiku komunikasaun, ne’e konklui tun ba baze hodi rona preokupasaun husi povu nian no defende nafatin direitu povu nian atu asesu ba justisa.  

“Hau asegura nafatin buat ne’ebe mak ami halo ona iha planu estrategiku ba 10 anos ninian tenke la’o nafatin,” Provedor Pinto hateten, iha Dili.

Nia hatutan, iha tempu badak sei hili estrutura foun ba PDHJ nian hanesan vise provedoria ne’ebe kompostu husi mane ida no feto ida.

“Liu-liu adjuntu, tanba tuir lei provedor eleitu mak sei hili nia adjuntu nain rua ou tolu,” Pinto esplika.

Nia mos husu ba Parlamentu Nasioanal hodi aprova orsamentu ne’ebe sufsiente ba PDHJ, hodi nune’e bele eleva servisu PDHJ diak liu tan iha future.

“Hau garante katak ho osan ne’ebe mak subsiente sei haforsa institusaun PDHJ ba oin diak liu tan,” nia dehan.

Enkuantu Deputada Angelina Rangel, iha esperansa bo’ot katak ho provedor foun bele lori institusaun PDHJ susesu liu tan ba future.

“Hau hanoin nia bele servisu hamutuk ho instituisaun hotu-hotu bele hadia estadu ne’e ba oin,” Deputada Rangel esperansa.

Kona ba orsamentu ba PDHJ, nia dehan, depende ba programa ne’ebe sira aprezenta, kuandu fo benefisiu bo’ot ba povu konserteza parlamentu sei aprova. “Ita sei deskuti lai,” nia dehan.