SEPS Aloka 1 Milhaun ba Kontrusaun Uma Vitima Dezastre Naturais

Sekretaria Estado Protesaun Sivil (SEPS) aloka osan ho montante 1 milhaun dolares amerikanu hodi halo kontrusaun ba uma vitima dezastre naturais hamutuk 177 iha Timor-Leste laran.

Sekretario Estado SEPS, Joaquim Gusmao, hatete uma sira ne’ebe mak hetan estragos total husi dezastre naturais hamutuk 330 no governo konstrui ona 153, no 177 mak seidauk.

“Tanba ne’e mak iha aloka tan osan 1 milhuan hodi halo kontrusaun uma ba vitima dezastre naturais 177 ne’e hodi finaliza tiha,” SEPS Gusmao dehan.

Nia dehan, osan ne’e sei la oferese direta vitima sira maibe governo utiliza hodi sosa ekipamentos konstrusaun, hodi oferese ba vitima sira nune’e bele konstrui fali sira nia hela fatin.

“Uma sira ne’ebe mak ita apoio hodi halo kontrusaun ne’e, dados foti husi ekipa dezastre naturais ne’e forma husi Ministerio Solidaridade Sosial no Inkluzaun ho Protesaun Sivil, nune’e mos autoridade lokal sira,” nia dehan.

Tanba ne’e nia dehan, iha apoio ekipamento kontrusaun sira ne’e sei la mosu erro ruma iha laran.

“Uma 153 mak ita kontrui uluk ne’e, oras ne’e dadaun familia vitima sira utiliza ona,” nia informa.

Entretanto pontu fokal dezastre naturais Munisipiu Ermera, Antonio Vieira hateten total familia ne’ebe mak afetado ba dezastre naturais hamutuk 714, husi ne’e uma ne’ebe mak hetan estragos total hamutuk 37.

“Uma 37 ne’e, ita nia governo konstrui ona 30, falta 7 mak to’o agora seidauk konstrui,” nia hateten.

Nia dehan, uma 7 apoio emergensia ne’e hotu ona maibe konaba kontrusaun nian mak seisauk.

“Ita espera katak ho orsamento ne’ebe mak governo preve ona ne’e uma 7 ne’e bele involve hotu iha kontrusaun,” nia hateten.

Tanba ne’e nia dehan, familia vitima uma 7 ne’e oras ne’e dadaun hela deit ho sira nia familia hodi hein governo apoio kontrusaun ba sira nia uma.