Sábado, Fevereiro 27, 2021
Total visitors: 550453

Ministero Edukasaun Juventude no Desporto (MEJD) Armindo Maia hateten ministerio presija kria kondisaun ba ema ho kondisaun difisiente atu bele asesu ba edukasaun hodi kompete ho ema kondisaun bain-bain sira ita Timor-Leste.

Ministero Edukasaun Juventude no Desporto (MEJD) Armindo Maia hateten ministerio presija kria kondisaun ba ema ho kondisaun difisiente atu bele asesu ba edukasaun.

Nia dehan, dezenvolvimento edukasaun inkluzivo ne’e importante tebes hodi fasilita maluk difisiente sira bele asesu ba esdukasaun iha nivel saida deit, tanba ne’e presija prepara kondisaun.

“Dadaun ne’e ita prepara ona kondisaun balun iha eskola sira hanesan rampa, haris fatin ne’ebe mak ema ho kondisaun difisiente bele asesu ba,” Ministro MEJD hateten.

Nia dehan, kondisaun hirak ne’e ministerio kria etapa por etapa tanba hare ba orsamento ne’ebe mak alokado ne’e ki’ik liu fali programa governo nian ne’ebe mak planea ona.

“Kondisaun balun ne’ebe mak VIII governo kria ne’e bazeia ba programa prioridade ne’ebe mak iha katak dezenvolvimento edukasaun inkluzivo sai prioridade iha ami nia mandatu,” nia informa.

Nia dehan, durante ne’e edukasaun inkluziva ne’e iha, maibe ministro hakarak dezenvolve diak liu tan nune’e ema difisiente sira labele lakon oportunidade ba edukasaun.

“Ita sei prepara nafatin fasilidade ne’ebe adekuado ba maluk difisiente sira, liu-liu difisiente matan ita tenke prepara makina brail, sira ne’ebe mak la rona maibe sira bele hare hodi hakerek deit, ba sira ne’ebe mak la bele koalia tenke aplika lingua jestual,” nia informa.

Entretanto, Kordenador Rede Edukasaun Timor-Leste Coalition for Education (TLCE) Jose Monteiro hateten, atu dezenvolve edukasaun inkluziva tenke iha fundasi metin liu-liu mak infrastrutura ne’ebe mak asesivel ba ema difisiente.

“Atu dezenvolve area edukasaun inkluziva importante atu prepara mak professor espesifiku sira no infrastrutura ne’ebe mak ema difisiente bele asesu livre no labele depende ba ema seluk,” nia saliente.

Nia dehan, professor sira ne’ebe mak atu transforma siensia ne’e mos tenke ema ne’ebe mak iha formasaun espesifiku duni tanba hanorin ema difisiente la hanesan estudante bain-bain sira.

“Maibe TLCE orgulho tebes tanba governo bele prepara ona kondisaun balun ne’ebe mak nesesidade ba ema difisiente maske la sufisiente. Ita espera no enkoraja nafatin atu bele kuntinua kompleta fasilidade sira ne’ebe presija,” TLCE Monterio hateten.

Tanba ne’e, TLCE espera katak programa prioridade edukasaun inkluziva ne’e sei realiza maske lori tempo naruk maibe presija mos kuntribuisaun entre linha ministerio relevante sira atu nune’e bele dezenvolve.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04