- Publika iha: 16 Dezembro 2020
Ministra da Saúde, Doutora Odete Maria Freitas Belo hateten akordu servisu entre ministerio da saúde no organizasaun nasional ema ho defisiensia Raes Hadomi Timor Oan (RHTO) atu fo kapasitasaun ba profesional saúde sira promove atendimentu saúde ne’ebe inklusivu.
“Ami hakarak hasoru malu atu hatene no konhese diak liu tan ita nia maluk defisiente sira nia nesesidade no sira bele partilia esperensia mai ita atu buat ne’ebe ita hakerek iha akordu ne’e ita bele implementa diak,” nia hateten hafoin halo enkontru dahuluk ho NGO RHTO no ema ho defisiente sira iha salaun Ministerio da Saúde Kaikoli, Dili.
Nia dehan servisu ne’ebe sei halao entre sira no ONG RHTO mak kapasitasaun ba profesionais saúde sira konaba atendimentu saúde inklusivu no asesibilidade ema ho defisiente tanba maioria fasilidade saúde la iha asesbilidade ba ema ho defisiente.
Nia haktuir dezenho infrastruktura fasilidade saúde sira tuir mai sei konsidera mos nesesidade maluk ema ho defisiente sira nian, liu-liu sira nia asesu ba fasilidade sira tanba sira iha direitu atu hetan atendimentu saúde ne’ebe hanesan ho ema kondisaun la defisiensia.
Nia informa servisu kapasitasaun kona ba saúde inklusivu ba profesional saúde sira halao ona iha munisipio balun no sei kontinua ba munisipio sira seluk atu bele promove atendimentu saúde ne’ebe inklusivu ba ema hotu inklui ema ho defisiente sira.
Iha parte seluk, Diretor Executivu RHTO, Joãozito dos Santos hateten akordu koperasaun servisu ne’e ba tinan tolu atu kontinua servisu kapasituasaun ba profesional saúde sira kona ba saúde inklusivu.
“Objetivu atu hametin relasaun servisu entre parte rua ne’e, liu-liu ba saude inklusiva atu ema hotu inklui defisiente sira asesu ba saude ne’ebe igual, dignidade no la husik ema ida iha kotuk,” nia hateten.
Nia dehan ema defisiente barak mak seidauk iha asesu ba atendimentu saúde tanba problema distansia entre hela fatin ho fasilidade saúde no kestaun seluk mak asesibilidade.
Nia hatutan antes ne’e sira iha ona koperasaun servisu ho Institutu Nasional Saúde (INS) fo formasaun ba profesional saúde sira iha munisipio tolu hanesan Dili, Ermera no Baucau kona ba atendimentu saúde ba ema hotu sein diskriminasaun.