- Publika iha: 17 Fevereiro 2021
Xefe Gabinete Kontrolu Kualidade no Komunikasaun Sosial, iha Hospital Nasional Guido Valdares (HNGV), Sara Maria Xavier informa iha tinan 2020, ema nain 987 maka mate husi total 22,674 pasientes ne’ebe baixa iha hospital.
Nia salienta pasiente sira ne’e, nain 453 maka mate depois baixa durante 48 oras resin, no nain 534 mak mate antes 48 oras baixa iha hospital tanba sofre moras kronika grave oioion hanesan atakasaun fuan, kankru, diabetes no seluk tan.
“Ita presiza hadia diak liu tan ita nia kualidade atendimentu ba ita nia pasiente sira atu ita bele redus taxa mortalidade sira ne’e. Dala ruma ita nia pasiente sira mai ho kondisaun sira ne’ebe grave tebes hanesan kankru ho stadiu avansadu entaun mai hetan deit kuidadu paliativus, no balun mai orgaun vital sira hanesan rins falha tanba ne’e labele salva sira,” nia hateten liu husi konferensia imprensa iha Bidau, Dili.
Nia dehan tuir padraun Organizasaun Mundial Saúde (OMS) katak taxa mortalidade iha hospital liu 45/1,000 konsidera grave no presiza hare fali kualidade atendimentu.
Nia haktuir dadus HNGV nian hatudu iha tinan 2020, taxa mortalidade Net Death Rate 24/1000, no taxa mortalidade bruto 43/1000, signifika sei iha lina ne’ebe diak, maibe presiza hadia diak liu tan kualidade atendimentu.
Nia hatutan taxa okupasaun kama iha HNGV atinji 90%, no sala enfarmaria balun liu 100% tanba numeru pasiente barak liu kapasidade kama ne’ebe iha, no rotasaun utilizasaun kama 0% katak laiha kama ida mak mamuk.
Nia dehan alende fo atendimentu ba pasiente sira iha nasional, liu-liu refere husi sentru saúde komunitaria sira iha Dili laran, sira mos simu pasiente referral husi ospital referral sira hamutuk 7000.
Entretantu, membru parlamentu nasional, Deputado Antonio da Conçeicão husu governu atu fo atensaun makas ba funsionamentu atendimentu iha hospital nasional tanba pasiente barak presiza hela atendimentu saúde.
Nia preokupa governu nia orietasaun makas liu ba kontrolu no halo metigasaun ba surtu COVID-19, no haluhan tiha ema lorloron mate iha hospital nasional tanba moras seluk.
“Hau hanoin situasaun covid-19 halo ita preokupa, maibe labele halo funsionamentu hospital nian atu halo atendimentu ba sira ne’ebe moras tanba moras barak liu-liu labarik sira,” nia hateten.
Iha parte seluk, Diretor Nasional Servisu Apoia Hospitalar no Emergensia, iha Ministerio da Saúde, Doutor Nilton da Silva hateten planu atu eleva kapasidade hospital sira iha, maibe presiza investimentu ida longu prazu tanba tenke hare ekuipamentu, rekursu humanu no kestaun logistika seluk atu apoia servisu.
“Ita laos hare deit ekipamentu intermus kualidade no kuantidade ekipamentu, maibe ita presiza hare mos manutensaun ba ekipamentu sira ne’e. ita hare mos ita nia rekursu humanu, no kestaun logistika seluk hanesan infrastruktura inklui orsamentu,” nia hateten.