Quinta, Setembro 23, 2021
Total visitors: 578526

Vice Presidente Parlamentu Nasional, Deputada Maria Angelina Lopes Sarmento lamenta ho aktu empregador supermerkadu no loja balun deside koa salariu trabalhador sira ne’ebe rezultado teste swab PCR positivu Covid-19.

Vice Presidente Parlamentu Nasional, Deputada Maria Angelina Lopes Sarmento lamenta ho aktu empregador supermerkadu no loja balun deside koa salariu trabalhador sira ne’ebe rezultado teste swab PCR positivu Covid-19.

Nia salienta aktu ida ne’e la dignu ba trabalhador sira tanba trabalhador sira fo prestasaun servisu lorloron durante periodu estado emergensia, liu-liu iha situasaun serkasanitaria no konfinamentu obrigatoriu.

“Sira obrigadu ba halo swab teste, kuandu deteta positivu koa tan sira nia salariu, ne’e la dignu ba sira tanba ne’e ami husu SEFOPE no komisaun D atu halo inspesaun ba loja sira hodi koalia ho trabalhador sira,” nia hateten iha plenaria.

Nia preokupa salariu minimu ba trabalhador sira iha supermerkadu no loja balun $120 kada fulan, maske sira servisu liu ona tinan 10 to’o 15. No iha situasaun difisil pandemia koa tan sira nia salariu ho razaun sira hetan infesaun Covid-19 la tama servisu.

Entretantu, Presidente Komisaun D Parlamentu Nasional, trata asuntu Ekonomia no Dezenvolvimentu, Deputadu Antonino Bianco hateten sira sei tau iha agenda atu halo feskalizasaun iha trenu atu buka hatene informasaun lolos husi trabalhador sira.

“Empreza sira ne’ebe aproveita Timoroan depois halo swab teste positivu koa osan, ami sei hare hamutuk ho SEFOPE atu hetan informasaun sira ne’ebe verdade,” nia hateten.

Iha parte seluk, Diretur Executivu Servisu Rejistu no Verifikasaun Emprezarial (SERVE), Florêncio Sanches hateten dificuldade ne’ebe empreza sira enfrenta iha tinan ida, rua ba kotuk fo kontribuisaun makas ba kompanha sira hola desizaun hamenus trabalhador no hasai trabalhador tanba rendimentu menus.

“Serka sanitaria fo impaktu ba emprezariu sira, 100% sim tanba laiha movimentu pesoal no laiha movimentu bens servisu. Buat rua ne’e laiha automatikamente hamate ekonomia, maibe ida ne’e maka konsekuensia,” nia hateten.

Iha oportunidade ne’e, nia kongratula trabalhador hotu no enkoraja sira atu nafatin kapasita aan hodi bele compete iha servisu sira ne’ebe hanesan ho nivel ne’ebe a’as liu tan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04