MSSI Distribui Foos Saka 28.000 Ba Familia Vuneravel

Ministeriu Solidaridae Sosial no Inkluzaun (MSSI) halo ona distribuisaun foos hamutuk saka 28.000 ba familia ne’ebe mais vuneravel liu iha Timor-Leste laran.

Diretor Jeral MSSI, Rui Exposto, hateten foos saka 28.000 ne’ebe governu apoiu ne’e hodi tulun komunidade sira iha situasaun serka sanitaria no konfinamentu domisiliario iha kapital Dili.

“Tanba ne’e MSSI halo distribuisaun foos hodi fasilita familia sira ne’ebe mais vuneravel liu iha teritorio laran tomak kuaze 17.000, no ita deside apoiu foos saka 28.000 ba familia hirak ne’e,” nia dehan.

Nia dehan, alende halo distribuisaun foos sira mos apoiu tan nesesidade bazika hanesan mina, supermi, susu ben no seluk tan.

“Dadaun ne’e ita hahu distribui ona ba munisipiu hitu hanesan Manatuto, Aileu, Baucau, Viqueque, Ermera, Lospalos no Dili,” nia dehan iha knar fatin Dili.

Nia dehan, munisipiu seluk ne’ebe seidauk depois de finaliza tiha iha munisipiu hitu refere mak kuntinua fali ba munisipiu seluk ne’ebe mak seidauk.

“Tanba ne’e ita husu ba familia ne’ebe mak identifikadu ona ne’e, atu pasiensia oituan no ita sei distribui iha tempu badak,” nia hatetetn.

Tanba ne’e nia dehan, MSSI nafatin halo aproximasaun ho autoridade lokal sira nune’e bele kuntinua identifika tan familia sira ne’ebe mak mais vuneravel liu atu asesu ba ai-han iha situasaun serka sanitaraia.

Entretantu, Deputadu Parlamentu Nasional Mariano Asnami Sabino hateten iha situasaun ida agora ne’e hakarak ka lakoi govenru tenke hatur nia responsabilidade lolos hodi rezolve problema ne’ebe mak povu sira hasoru iha baze.

“Ita lakoi atu akontese tan povu mate ba hamlaha no balu tara an tanba hahan la iha hanesan akontesementu balun ne’ebe mak liu ona. Ita husu governu tenke tau responsabilidade lolos hodi rezolve problema povu nian,” Deputadu Asnami dehan.

Maibe nia dehan, situasaun ida agora ne’e povu hotu susar asesu ba ai-han tanba problema osan, tuir lolos ne’e apoiu ba povu hotu la’os familia vuneral sira deit.

“Tanba ne’e ita husu governu atu hare fali politika distribuisaun foos ne’e halo didiak no presija hadia fali nune’e foos ne’e bele distribui ba komunidade hotu iha Timor,” nia husu iha PN.