Quinta, Setembro 23, 2021
Total visitors: 578526

Diretor Jeral, iha Ministerio Solidaridade Sosial no Inkluzaun (MSSI), Rui Manuel Gago Exposto rekonhese apoiu humanitaria, ne’ebe durante ne’e fo ba vitima dezastre naturais sira no familia kibi’it laek sira la sensivel ba nutrisaun tanba barak liu fo foos deit.

Diretor Jeral, iha Ministerio Solidaridade Sosial no Inkluzaun (MSSI), Rui Manuel Gago Exposto rekonhese apoiu humanitaria, ne’ebe durante ne’e fo ba vitima dezastre naturais sira no familia kibi’it laek sira la sensivel ba nutrisaun tanba barak liu fo foos deit.

“Ita hare presiza tau forsa hamutuk konsentra ba programa atu kontribui redus malnutrisaun no pobreja iha ria laran. Entaun, ami mos hare ona apoiu humanitarian sira ne’ebe fo ba ita nia familia vulneravel sira, presiza hare fali kompozisaun sira atu nune’e bele kontribui ba redus malnutrisaun iha ita nia rai,” nia hateten hafoin partisipa iha enkontru Konselho Nasional Seguransa Aihan no Nutrisaun Timor-Leste (KONSSANTIL) nivel ministru, iha salaun Palacio da Sinzas Kaikoli, Dili.

Nia dehan apoiu humanitaria sira ne’ebe lao durante ne’e laos mai deit husi governu, maibe entidade barak. Entaun apoiu sira ne’e dala barak ho hanoin ajuda aihan ba familia sira han para bosu deit.

Nia hateten atu hadia servisu asistensia sira ne’e, tenke iha komitmentu entre ministerio setor sira hotu atu bele responde hanesan MSSI fo apoia foos, husi agrikultura ajuda fali produtu aihan seluk hanesan aifuan, modo, atu bele kompleta malu hodi redus duni problema nutrisaun iha rai laran.

Nia informa hafoin governu deside aplikasaun serka sanitaria no konfinamentu domisiliariu no dezastre naturais ne’ebe akontese iha loron 4 fulan Abril tinan 2021, sira apoia ona foos 35,000 saka ba familia kibi’it laek sira, liu-liu feto faluk, oan kiak, katuas ferik no ema defisiente.

Entretantu, Doutora Olinda dos Reis Albino hateten apoia humanitaria sira husi governu, individu no organizasaun privado sira ba komunidade sira ajuda hadia seguransa aihan no nutrisaun iha komunidade komun.

“Kona ba nutrisaun, depende ba utilizasaun ema nian ou oinsa maneja aihan sira ne’e atu fo nutrisaun ba familia, hanesan simu deit foos bele halo kombinasaun ho produtu seluk ne’ebe hanesan lakeru, mantolun bele ajuda ona estado nutrisaun ita nian,” nia hateten.

Nia dehan mekanismu ida ne’e maka sira halo durante ne’e, hodi ajuda inan isin rua, inan fo susu no labarik sira iha kampu evakuasaun iha munisipio Dili.

Iha parte seluk, Pontu vocal Scaling Up Nutrition (SUN Movement), iha Timor-Leste, Filipe da Costa suporta inisiativa liña ministerio save sira nian atu promove apoia humanitaria ne’ebe sensivel ba nutrisaun atu bele prevene malnutrisaun iha situasaun emergensia.

“Timor-Leste depois ita sai husi funu naruk, problema bo’ot ne’ebe ita agora hasoru maka malnutrisaun. Malnutrisaun nia impaktu ne’e laos kresimentu fisiku ka isin deit, maibe ba dezenvolvimentu kakutak mos, ne’ebe ita la tau atensaun didiak ita nia kualidade rekursu humanu sei problema no ita falha produs futuru lideransa ne’ebe kualidade ba ita nia nasaun,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04