Domingo, Outubro 17, 2021
Total visitors: 584029

Diretur Executivu Asosiasaun Defisiente Timor-Leste (ADTL), Cesario da Silva hateten ekipa vasinasaun Covid-19 presiza kria kondisaun ne’ebe asesivel ba ema ho defisiente sira, liu-liu iha area remotas atu asesu ba vasina tanba maioria sentru saúde no postu vasinasaun sira la asesivel ba ema ho defisiente.

Diretur Executivu Asosiasaun Defisiente Timor-Leste (ADTL), Cesario da Silva hateten ekipa vasinasaun Covid-19 presiza kria kondisaun ne’ebe asesivel ba ema ho defisiente sira.

Nia salienta kondisaun ne’ebe la asesivel no atendimentu ne’ebe la dignu halo ema ho defisiente sente la konfortavel no esklui aan atu hetan atendimentu kuidadu saúde.

“Ema ho defisiente barak liu depende ba familia no ema seluk, entau ho situasaun sira agora limita movimentu sai dezafiu bo’ot ba sira, liu-liu sira ne’ebe iha area remotas atu asesu ba kuidadu saúde tanba jeralmente kondisaun ne’ebe impede partisipasaun maka sentru saúde barak laiha asesibilidade difisil ba sira uza kadera roda no aitonka,” nia hateten iha servisu fatin Maskarinhas, Dili.

Nia dehan ema ho defisiente iha munisipiu Dili, barak maka simu ona vasina Covid-19, liu-liu sira ne’ebe halibur aan no servisu iha organizasaun defisiente sira.

Nia hateten ADTL no membru organizasaun defisiente sira nafatin halo sosializasaun no enkoraja ema ho defisiente sira atu hakbesik aan ba postu vasinasaun hodi simu vasina atu iha imunidade hasoru virus tanba vasina maka uniku meus prevensaun ne’ebe efetivu.

Entertantu, Vice Ministru da Saúde, Bonifacio Mau Coli dos Reis hateten atu hasa’e kobertura vasinasaun Covid-19, sira halo aproximasaun ho liña ministerio hotu to’o iha lider komunitaria sira atu halibur rekursu hamutuk hodi halo kampanha sensibilizasaun ba komunidade sira konaba vantajen vasina.

Nia dehan kobertura vasinasaun iha munisipio seluk sei ki’ik tebes tanba komunidade sira konsumu ona informasaun hoax sira, maibe ho kampanha sensibilizasaun ne’ebe halao intensifika iha komunidade bele ajuda konsensializa ema hotu hakbesik aan ba postu vasinasaun atu simu vasina.

“Enkontru hamutuk ho lider komunitaria sira tanba sira maka besik liu komunidade, entau ho sira nia prezensa atu konsensializa komunidade sira atu simu vasina. Tanba ho vasina deit maka ita bele protese aan husi virus Covid-19 no variante seluk ne’ebe regista ona iha rai laran,” nia hateten.

Nia hatutan ekipa vasinasaun hamutuk ho lider komunitaria sira fasilita atendimentu vasina iha nivel Aldeia, atu ema hotu bele iha asesu.

Tuir dadus progressu vasinasaun Covid-19 iha Timor-Leste, to’o iha loron 17 fulan Agostu tinan 2021, dose dahuluk atinji ona 45.6% no dose daruak atinji ona 17.8%.

Iha parte seluk, Reprejentante Organizasaun Mundial Saúde iha Timor-Leste, Doutor Arvind Mathur kongratula governu ne’ebe halo esforsu atu hasa’e kobertura vasinasaun iha rai laran, maibe preokupa ho komportamentu sosiedade nian, ne’ebe barak la kumpri medida preventiva sira tanba vasina lao fator determinante mesak tenke mantein protokolu saúde publika seluk.

“Hau nia observasaun lao iha Dili laran hare, laran ladun kontente tanba ema hira ne’ebe lao iha dalan sira la tuir regras protokolu saúde publika nian, entau taxa vasinasaun iha Dili a’as no kazu infesaun foun mos aumenta makas,” nia hateten.

Nia hateten ema ne’ebe simu ona vasina kompletu mos iha posibilidade atu hetan infesaun Covid-19, maibe posibilidade ne’e ki’ik, wainhira hetan infesaun mos kondisaun kaman, la hamosu komplikasaun no sei risku ki’ik atu hada’e virus ba ema seluk tanba ne’e importante ema hotu tenke vasina.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04