Domingo, Outubro 17, 2021
Total visitors: 584029

Diretora Servisu Saúde Munisipiu Dili, Agustina da Costa Segurado informa profesional saúde nain 50 resin mak hetan infesaun Covid-19, maibe sira sei iha rekursu ne’ebe sufisiente atu garante funsionamentu servisu esensial sira iha fasilidade saúde hanesan maternidade, emergensia no konsulta ambulatoriu.

Diretora Servisu Saúde Munisipiu Dili, Agustina da Costa Segurado informa profesional saúde nain 50 resin mak hetan infesaun Covid-19.

Nia salienta iha fator oioin ne’ebe kontribui ba profesional saúde sira barak hetan infesaun, bele utiliza ekipamentu protesaun pesoal la apropriado, ignora protokolu prevensaun sira wainhira halao servisu iha fasilidade saúde no iha uma tanba ekipamentu sira ne’e disponivel iha fasilidade hotu.

“Ita fo atensaun makas ba sira hotu atu labele menus ekipamentu protesaun ba sira nia fatin servisu tanba ida ne’e maka importante atu labele lori sira ba hetan infesaun, kuandu sira utiliza sasan sira ne’e ho diak,” nia hateten iha servisu fatin Formosa, Dili.

Nia hateten profesional saúde hotu ne’ebe halao servisu obrigatoriu tenke uza ekipamentu protesaun pesoal hodi evita transmisaun husi pasiente ba sira no husi sira ba pasiente tanba risku bo’ot akontese transmisaun durante halao servisu.

Nia informa profesional saúde nain 50 resin ne’e iha kondisaun ne’ebe lizeiru tanba sira hetan hotu ona vasina Covid-19 ba dose kompletu.

Entretantu, Membru Parlamentu Nasional, Deputado Antonio Verdial hateten governu iha responsabilidade atu asegura protesaun ba profesional saúde sira tanba situasaun agora grave presiza tebes sira atu salva vida komunidade.

Nia husu governu atu aselera pagamentu subsidiu ba liña frente sira, liu-liu profesional saúde sira atu enkoraja no motiva sira servisu servi rai no povu ida ne’e diak liu tan.

“Favor bo’ot ida hare kestaun ne’e tanba ema hira ne’e agente baibain ne’ebe presiza tebes tulun husi governu, liu-liu fo ema hira ne’e nia osan tanba fulan hitu ona sira seidauk simu,” nia hateten.

Iha parte seluk, Ministra da Saúde, Doutora Odete Maria Freitas Belo hateten governu halo ona pedidu ba nasaun doador sira atu apoia tan ekipamentu protesaun pesoal sira hodi asegura disponibilidade iha fasilidade saúde sira hotu tanba numeru kazu aumenta makas iha nasional no munisipiu.

“Ba NGO sira no ministerio sira ita bele apoia maskara, maibe ami mos tenke hare stok tanba ita lakohi tempu ida pesoal saúde sira laiha ekipamentu uza atu halo atendimentu ba pasiente sira,” nia hateten.

Konaba subsidiu ba ekipa liña frente, nia dehan sira hetan ona submisaun ba lista daran sria, maibe presiza halo fali verifikasaun ba dadus no dokumentu sira hanesan orden servisu, lista prezensa no orario servisu atu bele prosesu ba pagamentu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04