Sexta, Janeiro 21, 2022

Diretur Ezecutivu Asosiasaun Halibur Defisiensia Matan Timor-Leste (AHDMTL), Gaspar Afonso ejiji governu atu prepara template braille ba ema ho defisiensia matan hodi sira bele ezerse sira nia direitu votu ho segredu absoluta iha elisaun presidensial periodu tinan 2022.

Diretur Ezecutivu Asosiasaun Halibur Defisiensia Matan Timor-Leste (AHDMTL), Gaspar Afonso ejiji governu atu prepara template braille ba ema ho defisiensia matan hodi sira bele ezerse sira nia direitu votu ho segredu absoluta iha elisaun presidensial periodu tinan 2022.

Nia salienta hahu Timor hetan independensia tinan 2002, eleisaun sira ne’ebe halao ema ho defisiente matan ba vota sempre hetan akompanhamentu husi familia no kolega tanba governu seidauk kria kondisaun bulleting Braille atu fasilita sira hili mesak partidu ne’ebe sira hakarak.

“Ami nia votu ne’e seidauk segredu absoluta tanba familia akompanha ami no balun kolega mak akompanha ne’e ita bele bosok no lohi malu tanba ne’e mak hau dehan ita koalia deit la tau iha pratika ne’e hanesan deit,” nia hateten hafoin partisipa iha seminario nasional ho tema “Prosesu Eleitoral Seguru no Democratiku ba Partisipasaun Inklusivu” iha salaun Delta Nova Comoro, Dili.

Nia dehan sira halo ona advokasia ba instituisaun STAE no CNE atu konsidera sira nia nesesidade, liu-liu prepara templet Braille sukat tuir medida bulleting votu hodi fasilita defisiente matan sira iha elisaun presidensial no parlamentar tinan 2022.

Nia hateten sira iha rekursu naton atu apoia governu hodi prepara kondisaun sira ne’e ba ema ho defisiensia matan sira bele ezerse sira nia direitu votu iha loron elisaun ho segredu absoluta.

Nia hatutan dadaun ne’e sira servisu hamutuk ho UNDP fo formasaun letra Braille ba maluk sira defisiensia matan iha rejiaun leste kompostu husi munisipiu Manatutu, Baucau, Lautem no Viqueque, parte kosta sul hanesan munisipiu Ainaro, Covalima, Manufahi, parte rai klaran munisipiu Aileu, Dili, Bobonaro no Liquiça atu prepara sira partisipa iha elisaun tinan oin.

Nia informa dadus estatistika sensu populasaun tinan 2015, hatudu ema ho defisiente matan hamutuk 14,828 tanba ne’e governu tenke hare ona kondisaun sira atu fasilita sidadaun sira ne’e ezerse sira nia direitu votu iha loron elisaun.

Iha parte seluk, Diretur Providoria Direitus Humanu no Justisa (PDHJ), Bartolomeu Gonçalves espera elisaun periodu 2022, governu konsidera ona preokupasaun sira husi ema ho defisiente, liu-liu defisiente matan sira tanba iha elisaun anterior sira barak hasoru dificuldade.

“Sentru votasaun sira hotu kedas laiha kondisaun ba maluk defisiensia asesu ba votasaun. Ami rekomenda ba Ministerio Administrasaun Estatal no Ministerio Obras Publika atu hahu ona kria kondisaun hodi responde ba ita nia maluk sira ne’ebe hakarak ezerse sira nia direitu ba votu. No ami rekomenda mos governu atu kria kondisaun letra Braille atu defisiensia mata sira ezerse sira nia direitu,” nia hateten.

Sekretaria Estado Igualidade no Inkluzaun (SEII), Maria José da Fonseca Monteiro de Jesus hateten sira servisu hamutuk ho organizasaun portador defisiensia sira atu halo advokasia makas ba preokupasaun sira hodi asegura maluk sira ho defisiente bele partisipa ativu iha prosesu eleitoral tantu ba vota no kandidata aan.

“Ita halo advokasia atu iha meus komunikasaun oioin durante prosesu eleitoral tomak hahu husi resensiamentu to’o iha fo sai rezultadu. Ita halo advokasia tenke iha mos lian jestual no fasilidade oioin atu asegura sira bele akompanha prosesu ne’e tomak no partisipa ativa,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04