Sexta, Janeiro 21, 2022

Rezultado Avaliasaun Impaktu Sosio-Ekonomiku husi Covid-19 iha Timor-Leste, tinan 2021, hatudu situasaun pandemia Covid-19 no inundasaun ne’ebe akontese iha rai laran lori konsekuensia negativu bo’ot tebes ba familia vulneravel sira nian moris, liu-liu familia ne’ebe xefia husi feto no familia sira ne’ebe rasiu dependensia a’as tanba numeru membru bo’ot husi labarik, idosu no ema ho defisiente sira.

Rezultado Avaliasaun Impaktu Sosio-Ekonomiku husi Covid-19 iha Timor-Leste, tinan 2021, hatudu situasaun pandemia Covid-19 no inundasaun ne’ebe akontese iha rai laran lori konsekuensia negativu bo’ot tebes ba familia vulneravel sira nian moris.

Resident Representative UNDP iha Timor-Leste, Munkhtuya Altangerel hateten deskobrementu importante iha peskiza ne’e mak 59% husi 4,292 uma kain ne’ebe intervista mak kiak liu no posibilidade atu hetan dificuldade bo’ot liu iha sira nia moris durante periodu pandemia desde fulan Marsu tinan 2020, tanba sofre moras todan, halo despeza bo’ot ba saúde, koileta produsaun menus no membru familia sira mate.

“Estudu ida ne’e mos hare ba uma kain sira ne’ebe vulneravel tebes, liu-liu uma kain sira ne’ebe ema defisiente iha, labarik barak no idozu sira. Iha situasaun sira hanesan ne’e, sira hetan impaktu bo’ot liu tanba sira nia vulnerabilidade, entau ita presiza iha politika protesaun sosial ida ne’ebe diak liu hodi tau matan no fo asistensia ba membru uma kain sira ne’ebe vulneravel,” nia hateten hafoin partisipa iha serimonia lansamentu avaliasaun impaktu sosio-ekonomiku husi Covid-19 iha Timor-Leste tinan 2021, ne’ebe halao husi governu ho agensia ONU iha Hotel Timor, Dili.

Nia dehan iha inisiu governu halo ona intervensaun lubun ida liu husi apoia subsidiu sira no 70% populasaun sente kontente ho ajuda sira husi governu iha situasaun pandemia no inundasaun, maibe komunidade barak mos laiha asesu ba subsidiu sira ne’e tanba peskiza hatudu 41.1% populasaun Timor-Leste afetadu husi inseguransa ai-han kmaan no todan durante periodu pandemia Covid-19 no indunasaun tanba restrisaun Covid-19 aumenta presu ai-han osan la iha atu sosa no ai-han barak estragadus husi dezastre naturais ne’ebe akontese.

Nia hateten estratejia ne’ebe utiliza husi uma kain kiak sira atu bele aguenta sustenta sira nia moris mak faan rai, faan sasan sira hanesan osan mean no seluk tan.

Nia informa peskiza ne’e halao iha teritorio tomak no hetan partisipasaun husi 23,362 individu iha 4,292 uma kain ne’ebe hetan intervista, no halo mos intervista ho informadu save sira hanesan NGO inklui emprezariu informal, micro no mediu sira iha rai laran.

Iha parte seluk, Primeru Ministru Taur Matan Ruak rekonhese situasaun sosio-ekonomia actual rai laran grave tanba kontribui makas husi estabilidade politika rai laran, reseisaun ekonomiku, pandemia Covid-19 no dezastre naturais ne’ebe akontese iha tinan 2020 ate 2021, ne’ebe rejulta estragus kuaze $200 mileons.

“Hau hanoin ho situasaun ida ne’e importante liu ba ita mak rekomendasaun sira. Problema ida ita nian mak ita nia ekonomia ne’e setor produtivu, maibe diversifikasaun ekonomia ne’e ita susar. Ita bo’ot sira hare diversifikasaun ekonomia ita koalia setor turismu, turismu hira mak iha ita nia rai no setor agrikultura ita sei bele fo han populasaun fulan rua deit,” nia hateten

Nia dehan peskiza sira ne’e hatudu lisaun bo’ot ida ba governu atu reforsa kapasidade resilensia iha aspeitu hotu sosio-ekonomia, infrastruktura, saúde, edukasaun no digitalizasaun hodi hadia atu bele reziste diak liu tan iha krize sira seluk mai iha futuru.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04