Sexta, Janeiro 21, 2022

Ministra da Saúde, Doutora Odete Maria Freitas Belo rekonhese servisu atendimentu saúde ba moras mental iha rai laran seidauk diak sei fraku tebes tanba Timor-Leste foin iha psikiatria nain ida, ne’ebe halao servisu iha hospital nasional.

Ministra da Saúde, Doutora Odete Maria Freitas Belo rekonhese servisu atendimentu saúde ba moras mental iha rai laran seidauk diak sei fraku tebes tanba Timor-Leste foin iha psikiatria nain ida, ne’ebe halao servisu iha hospital nasional.

Nia dehan esforus ne’ebe sira halo mak fo formasaun ba mediku jeral, enfermeiru no parteira sira ne’ebe konaba guia atendimentu ba moras mental sira atu bele fo atendimentu kuidadu saúde ba sidadaun ne’ebe sofre moras mental.

“Iha mediku ida rua mak iha interese foti area ida ne’e, entau ita tenke sensitive ho kondisaun sira fo formasaun ba enfermeiru no parteira sira tanba asuntu defisiente ne’e laos hare deit ba defisensia matan, tilun no ain, maibe area barak ne’ebe ita tenke tau atensaun, liu-liu ami saúde,” nia hateten hateten bainhira sai orador ba dialogu ho tema “Garantia Situasaun ne’ebe kondisivu ba Ema ho Defisiensia,” iha Delta Nova, Dili.

Nia hateten kada tinan iha kouta ba mediku jeral sira atu hasai espesialista ba moras mental nian iha rai liur, maibe ema ne’ebe interese sai psikiatria ne’e menus no dala ruma laiha ema ida mak hakarak ba tanba ne’e husu familia sira atu enkoraja oan sira sai mediku no hasai espesialista ba area metal nian.

Nia hatutan desizaun ne’ebe governu foti mak kontratu psikiatria husi rai liur mai, maibe aktualmente governu iha koperasaun ho Cuba tanba ne’e iha psikiatria cubanu balun mak apoia hela servisu atendimentu iha hospital sira.

Entretantu, Diretur Jeral, iha Ministerio Solidaridade Sosial no Inkluzaun, Rui Exposto konsidera problema saúde mental ne’e seriu no presiza asaun integradu hodi tau matan ba sidadaun sira ne’ebe sofre moras mental, ne’ebe dadaun ne’e hela iha dalan ninin sira.

“Ami kada tinan kontinua fo apoia ba PRADET no São João de Deus Laklubar atu hare asuntu ida ne’e, maibe São João de Deus Laklubar iha problema ho kapasidade no fasilidade tanba iha deit 16 kamas labele konsege kobre hotu,” nia hateten.

Nia dehan MSSI bele loke espasu, maibe presiza hare fali rekursu humanu no fasilidade seluk atu bele fo atendimentu ne’ebe dignu ba maluk sira ne’ebe sofre moras mental.

Nia informa iha tinan 2021, sira fo apoia fundus ba organizasaun sosial hitu ne’ebe hare asuntu defisiensia oioin ho total montante orsamentu $340,000.

Iha parte seluk, Reprejentante Institutu Kadalak Sulimutu, Fabio Martins hateten servisu atendimentu saúde deit sei labele rezolve problema moras mental iha rai laran tanba fator ne’ebe kontribui ba ema ida monu ba moras mental mak sosio-ekonomia.

“Asuntu defisiensia psikososial, ne’e laos individu, maibe kauza mai husi sitema ne’ebe la kria igualidade iha sosiedade ne’e mak lori konsekuensia ba moras mental a’as,” nia hateten.

Nia dehan observasaun nota katak servisu asaun prevensaun ba problema moras mental iha rai laran seidauk tanba pratika ne’ebe hare mediku sira orienta ema sira ne’ebe iha problema mental reza no fo mos medikamentu balun atu ajuda rekupera, maibe problema sosio-ekonomia ne’ebe sai fator la fo atensaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04