Sexta, Janeiro 21, 2022

Sekretariu Ezecutivu Komisaun Nasional Kombate HIV/SIDA, Atanasio de Jesus hateten tratamentu Antiretroviral Therapy (ART) dadaun ne’e sei disponivel deit iha hospital referral, rejional sira no hospital nasional inklui sentru saúde balun iha munisipiu Dili tanba ne’e sidadaun sira ne’ebe konfirmadu infetadu husi virus HIV difisil atu asesu ba tratamentu, liu-liu sira hela iha area rural.

Sekretariu Ezecutivu Komisaun Nasional Kombate HIV/SIDA, Atanasio de Jesus hateten tratamentu Antiretroviral Therapy (ART) dadaun ne’e sei disponivel deit iha hospital referral, rejional sira no hospital nasional inklui sentru saúde balun iha munisipiu Dili.

Nia salienta hahu tinan 2003 to’o fulan Julho tinan 2021, komulativu kazu konfirmadu iha 1,364. No husi numeru ne’e, ema nain 155 mak mate ona no nain 656 mak ativu hela tratamentu Antiretroviral tanba ema barak hasoru dificuldade atu asesu ba tratamentu.

“Agora dadaun tratamentu sei menus, liu-liu fatin tratamentu. Iha Dili iha fatin lubun ida, maibe iha musipiu aat loos hanesan iha Lospalos no Viqueque nia tenke mai iha Baucau, ne’e geografikamente distansia do’ok sa tan sira hela iha suku sira ne’ebe rural liu,” nia hateten iha servisu fatin Pantai Kelapa, Dili.

Nia dehan durante ne’e iha organizasaun balun ne’ebe apoia tratamentu, liu-liu lori aimoruk ba pasiente sira, maibe sira mos hasoru dificuldade tanba kondisaun estrada ne’ebe ladiak.

Nia hateten ema ne’ebe konfirmadu positivu HIV, wainhira halo tratamentu diak no konsumu medikamentu lorloron mak sira iha imunidade forte no kondisaun diak bele halao servisu hanesan ema sira ne’ebe la hetan infesaun, maibe kuandu la halo tratamentu mak virus estraga imunidade ou tama faze AIDS hamosu komplikasaun oioin potensial lakon vida.

Nia hatutan kuandu ema hotu asesu ba tratamentu ARV mak virus ne’e kontroladu ona no forsa atu hada’et ba ema seluk mos menus tanba ne’e bele kontribui ba redus kazu infesaun foun iha rai laran.

Iha parte seluk, Xefe Programa HIV, iha Klinika Bairo Pite, Mendizio da Costa Tilman hateten dadaun ne’e pasiente ho HIV hamutuk nain 188 mak asesu ba sentru ART hodi hetan medikamentu.

Nia dehan medikamentu ne’ebe iha laos atu kura, maibe halo terapia. No medikamentu ne’ebe uza iha sentru mak medikamentu ne’ebe rekomenda husi Organizasaun Mundial Saúde hanesan Non-nucleoside reverse transcriptase inhibitors (NNRTIs), Nucleoside reverse transcriptase inhibitors (NRTIs), Protease inhibitors (Pls). No tinan 2020, komite deside hatama tan aimoruk rejimentu foun Entry Inhibitors (EI).

“Ita hatene katak virus HIV laiha medikamentu ou aimoruk atu kura, maibe iha aimoruk ne’ebe atu kontrola hanesan ita dehan ART no sira tenke hemu aimoruk ne’e lorloron. Entau sira tenke foti aimoruk ne’e fulan-fulan ou depende ba metodu ne’ebe aplika iha sentru ART ida-ida tanba pasiente balun ba munisipiu halo kultura ita fornese aimoruk ba sira to’o loron ne’ebe sira fila fali mai foti” nia hateten.

Nia preokupa ho epidemia HIV iha rai laran tanba bazea ba kazu komulativu numeru kazu infesaun foun aumenta makas no pursentajen bo’ot husi komunidade grupo idade produtivu sira tanba ne’e presiza involvimentu entidade hotu nian no konsensia individu atu prevene aan husi infesaun virus ne’e.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04