- Publika iha: 10 Dezembro 2021
Membru Parlamentu Nasional husu governu kria uluk kondisaun mak hasai grupu Arte Moris husi fatin anterior iha eis muzeum Comoro, iha kapital Dili.
Deputada Veneranda Lemos hateten Timoroan hotu no ema estrangeiru sira hotu hatene katak grupu Arte Moris hamahan an iha fatin eis muzeum Comoro durante sira nia ezistensia, maibe governu uza forsa hodi hasai obrigatoriu hasai sira husi fatin refere.
Nia hateten, tinan 18 ona juventude kreativu sira halibur balun iha muzeum ne'e, maibe ho asaun ne'ebe mak governu utiliza hodi duni sai joventude sira ne'e la merese.
"Ita triste tebes hare governu defaktu ida ne'e soe sai arte sira nia sasan inklui dezennu ne'ebe mak sira pinta ho sentimentu tomak, pinta ita nia heroi, veteranos no luta nain sira. Governu hasai sem prepara fatin alternativu ruma ba sira," Deputada Lemos hateten.
Tanba ne'e nia dehan, tuir lolos ne'e prepara uluk fatin alternativu depois mak hasai sira, nune'e sira bele halibur malu hodi espresa sira nia talentu husi musica no dezenhu, laos derepente deit uza forsa hodi hasai obrigatoriu husi fatin.
Entretantu, Sekretariu Estadu Sekretaria Arte no Kultura (SEAK), Teofilho Caldas, hateten SEAK ne'e eziste hodi tulun grupu arte hotu iha Timor-Leste inkliu grupu Arte Moris, maibe sira mak lakoi kopera ho governu.
"Antes ita hasai grupu Arte Moris sira husi eis muzeum Comoro ne'e, ita prepara no hatudu ona fatin ba sira. Fatin ita atu lori sira mak armazen Bebora. Ita lori sira ba iha ne'eba mak governu hamutuk ho sira hodi kira kondisaun ne'ebe mak diak ba sira tanba, ita hatene katak turista sira mai iha Timor fatin primeiru ne'ebe sira hakarak vitiza mak Arte Moris," SEAK Caldas hateten.
Tanba ne'e husu ba juventude grupu arte moris sira atu kopera ho governu no kumpri ordem hodi ba okupa lai fatin ne'ebe mak governu prepara ona ne'e depois mak dezenvolve fatin ne'e diak liu tan.
Presidente Asosiasaun Arte Moris Timor-Leste, Ilwanto Dana Bere, hateten sira la konkorda ho fatin armagem Bebora ne'ebe mak governu ofrese ba sira tanba la sufisiente hodi halo sira nia aktividade.
"Fatin ne'ebe governu ofrese ne'e ami lakoi tanba komunidade nian uma haleu, rate, fahi luhan, no armagem ne'e la sufisiente," nia hateten.
Nia dehan, fatin ne'ebe sira rekomenda ba governu ne'e mak, eis blok iha Hotel Timor kotuk agora dadaun veteranos mak utiliza, fatin seluk mak edifisiu World Vision, no opsaun ikus mak area heliport iha palaciu prezidente nian kotuk.