- Publika iha: 12 Janeiro 2022
Fundasaun Mahein (FM) husu Komando Jeral Polisia Nasional Timor-Leste (PNTL) aselera lalais estatuto reforma PNTL nian hodi bele halo reforma ba membro sira ne'ebe mak idade avansado ona.
Diretor Interino FM, Sancho Xavier, hateten durante ne'e FM hare katak instituisaun PNTL seidauk iha estatutu rasik hodi reforma membru sira ne'ebe mak idade tama ona ba reforma.
"Ita hare durante ne'e instituisaun PNTL seidauk halo reforma ba membru sira, tanba ne'e mak membru sira ne'ebe idade to'o ona [reforma[ mos sei servisu to'o lakon vida," FM Xavier hateten.
Nia dehan, membru sira ne'ebe idade avansadu no sira husu tama ba reforma, mos labele tanba komando PNTL la iha estatutu pesoal hodi garante membru sira nia moris bainhira reforma.
"Situasaun sira hanesan ne'e ita persija hadia, nune'e bele fo tempo ba membru sira ne'ebe idade avansado tenke deskansa iha uma," nia salienta.
Entretanto Komandante Jeral PNTL, Komisario Faustinho da Costa, hateten durante ne'e komando atu reforma nian membro sira ne'ebe idade avansado maibe instituisaun PNTL seidauk finaliza.
"Ita seidauk iha estatutu maibe iha regimi funsaun publika katak ba sira ne'ebe mak idade avansado ona komandu husu sira karik hakarak deskansa entaun deskansa se bainhira sira lakoi komando labele obriga," Komisario Costa hateten.
Maibe nia dehan, bainhira komando prosesu hotu ona estatuto maka komando PNTL sei halo prosesu reforma ba membru sira ne'ebe idade avansado.
"Estatutu tantu ami nia organika ne'e aprezenta ona ba governo nia kompetensia hodi aselera estatuto ne'e," Komisario PNTL Costa hateten.