- Publika iha: 04 Janeiro 2023
Adjunta Xefe Kaza Sivil, Henriqueta Maria da Silva hateten Gabinete Presidénsia Repúblika kolabora ho servisu saúde munisipál Díli, hahú implementa programa fornesimentu hahan nutritivu no pakote formasaun edukasaun nutrisaun ba inan isin-rua, inan fósusu no labarik sira ne’ebé ho kondisaun malnutrisaun.
Nia salienta programa nutrisaun sai hanesan prioridade prinsipal iha ajenda Prezidente Repúblika, José Ramos Horta nian durante períodu tinan lima mai tanba dadus hatudu taxa malnutrisaun, liu-liu ba labarik tinan lima mai kraik sei aas.
“Ita hakarak nasaun ida ne’e mai ho fundasaun ida forte, ita tenke fó atensaun ba produsaun ema ne’ebé saudável, liu-liu inan isin-rua no labarik sira atu sira saudável iha fiziku, mentál no intelijénsia hodi halo dezenvolvimentu iha rai ida-ne’e. Kuandu ita lahalo ida-ne’e nasaun ne’e sei nafatin sai nasaun frajil tanba rekursu humanu ne’ebé frazil mós,” nia hateten bainhira partisipa iha serimónia lansamentu programa kombate malnutrisaun iha Klinika Bairo Pite, Díli.
Nia dehan inan no oan sira la’ós atu hetan de’it fornesimentu hahan lorloron, maibé sira sei hetan formasaun kona-ba tabela aihan nutritivu, no prátika oinsa prepara ai-han ba sira-nia família.
Nia hateten programa ne’e pilotu iha suku Bairo Pite, postu administrativu Dom Aleixo munisípiu Díli. No sei implementa mós iha munisípiu Ermera postu administrativu Railaco.
Tuir dadus peskiza aihan no nutrisaun tinan 2020, hatudu labarik idade tinan lima mai kraik pursentu 47 mak sofre malnutrisaun raes badak, pursentu 32 todan menus no pursentu 8,6 kondisaun krekas.
Iha parte seluk, Diretora Servisu Saúde Munisipál Díli, Agustina Segurado hateten sira prontu atu kolabora ho gabinete prezidénsia atu identifika inan isin-rua, inan fósusu no labarik sira ne’ebé enfrenta kondisaun malnutrisaun atu bele integra iha programa ne’e.
“Atividade ne’e di’ak tebes bele ajuda ministériu saúde no suporta família sira, liu-liu inan isin- rua, inan fó susu sira atu mai partisipa no hetan edukasaun nutrisaun tanba laos sira hetan fornesementu hahan deit, maibé sira envolve direita ba preparasaun hahan hahú husi tabela produtu aihan ne’ebé uza no oinsá prepara atu sira bele iha koñesimentu no kontinua uza modelu ida-ne’e iha família,” nia hateten.
Nia informa sira identifika ona labarik idade tinan hitu mai kraik hamutuk na’in 100 no inan isin-rua, inan fósusu nain 120, ne’ebé ho kondisaun malnutrisaun grave no moderadu atu hetan fornesimentu hahan no pakote formasaun edukasaun nutrisaun durante loron 30 iha postu saúde Kampung Alor, postu saúde Maloa no Klinika Bairo Pite.
Nia hatutan durante programa ne’e lao ekipa pesoal saúde sira mos halo monitorizasaun ba sira nia kondisaun saúde.