- Publika iha: 21 Fevereiro 2023
Diretór Jerál, iha Ministériu Solidaridade Sosiál no Inkluzaun (MSSI), Florencio Pina Dias Gonzaga hateten implementasaun planu asaun nasionál ba ema ho defisiénsia hatudu iha mudansa oituan, asesu ba tratamentu iguál, dignu no partisia másimu iha oportunidade sira atu alkansa sira-nia potensialidade hodi kontribui ba dezenvolvimentu nasionál ida-ne’ebé inkluzivu no sustentável.
Nia salienta progresu servisu balun ne’ebé ministériu save sira atinji ona mak Ministériu Transporte no Komunikasaun konstrui ona rampa hodi fasilita ema ho defisiénsia sira asesu hodi hetan atendimentu ba tratamentu transporte terrestre nian, iha Sekretáriu Estadu Juventude Desportu empodera foinsa’e sira hola parte iha asean para games ho modalidade oioin, Ministériu Ensinu Superior, Siénsia no Kultura iha tinan 2022, fó ona oportunidade ba ema ho defisiénsia na’in 25 asesu ba Universidade Nacional Timor Lorosa’e no Institutu Siénsia Saúde. No susesu seluk mak Sekretária Estadu Komunikasaun Sosial estabelese ona rádio komunidade defisiénsia no aloka fundu ba formasaun tradutór lian jestual hodi emprega iha RTTL, E.P no promove mós iha televizaun privadu sira.
“Ha’u hanoin ohin filmajen hatudu progresu lubun ida iha área transporte nian, ensinu superiór nian ita hatene maluk ho kondisaun difisiénsia na’in 25 hetan asesu ba UNTL no institutu siénsia saúde no parte komunikasaun nian hetan atinjimentu ne’ebé di’ak,” nia hateten bainhira partisipa iha Enkontru Avaliasaun Implementasaun Planu Asaun Nasionál ba Ema ho Defisiénsia (PAN-EhD) iha Timor Plaza Comoro, Díli.
Nia dehan iha inisiu hasoru dezafiu, maibé dadaun ne’e ministériu save sira informadu hotu ona ba asuntu inkluzasaun defisiénsia tanba ne’e komesa fó ona prioridade ba implementasaun programa sira ne’ebé liga ho asuntu defisiénsia nian.
Entretantu, Jestór Programa, iha Asosiasaun Halibur Defisiénsia Matan Timor-Leste (AHDMTL), Luciano Borges rekoñese tratamentu ba ema ho defisiénsia hatudu iha ona mudansa ituan tanba limitasaun rekursu sira atu implementa planu asaun nasionál ne’e ho másimu.
“Ami semrpe rekomenda no halo advokasia makaas ba liña ministériu no sekretáriu estadu sira ne’ebé tama iha implementasuan planu asaun nasionál ba ema ho defisiénsia sira. Ami rekomenda makaas mak atu aloka orsamemtu ne’ebé sufisiente hodi implementa planu ne’e ho di’ak, tanba kuandu laiha orsamentu labele implementa ho di’ak,” nia hateten.
Iha parte seluk, Primeiru Sekretáriu Dezenvolvimentu Humanu, iha Embaxada Australia Timor-Leste, Aidan Goldsmith afirma sira-nia komitmentu atu apoia governu hodi garantia ema ho defisiénsia sira hetan tratamentu iguál, dignu no partisipa másimu iha oportunidade sira hodi alkansa sira-nia potensialidade tomak.
“Australia konsidera inkluzaun defisiénsia hanesan asuntu transversál importante ida hodi aliña iha institusaun no programa sira hotu. Ami-nia parseiru dezenvolvimentu sira hotu ida-idak iha nia komitmentu hodi aliña inkluzaun defisiésia iha sira-nia programa prioridade sira hanesan saúde, edukasaun, solidaridade sosial, agrikultura, estrada rurál no bee moos,” nia hateten.