- Publika iha: 08 Agosto 2023
Ministru Ministerio Interior (MI), Francisco da Costa Guterres, hateten governu ho apoia husi ajénsia UN Women, iha Timor-Leste, estabelese rede nasionál mediasaun atu fasilita mediasaun ba konflitu ne’ebé akontese iha sosiedade.
Nia dehan governu sei halo esforsu atu konsensializa komunidade katak problema ne’e la’ós rezolve ho forsa. Maibé rezolve ho meiu ko’alia ba malu, rezolve ho respeita ema ida-ida nia direitu, nune’e bele lori benefisiu ne’ebé mutua ba grupu sira ne’ebé iha konflitu.
“Atu informa mós katak iha nonu governu, ita iha programa ida kona-ba edukasaun sívika nivel nasionál. Ita bolu dehan rezolusaun konflitu no mudansa mentalidade, ne’e programa governu nian ne’ebé ita tenke investe fó formasaun ba komunidade hasa’e sira-nia konsiénsia no mudansa mentalidade katak konflitu só bele lori terus, susar, ódiu no vigansa. Paz mak sei lori benefisiu ba ita-nia rai no ita aan rasik,” nia hateten hafoin partisipa iha serimónia lansamentu rede nasionál mediasaun iha Hotel Timor Colmera, Díli.
Nia hateten servisu mediasaun durante ne’e la’o tiha ona iha komunidade, ho estabelesimentu Konsellu Polisiamentu Komunitária, ne’ebé lidera husi xefe suku sira no konsellu suku sira atu fasilita halo mediasaun ba disputa sira ne’ebé akontese iha nivel komunidade nian.
Nia hatutan prezensa rede nasionál ne’e atu formaliza no reforsa sistema servisu mediasaun iha rai-laran, tanba institusaun estadu lubun ida mak hola parte iha rede ne’e, hanesan Ministériu Interior, Ministériu Justisa, Ministériu Administrasaun Estatal, Ministériu Solidaridade Sosial no Inkluzaun, Sekretáriu Estadu Formasaun Profesional no Empregu, Polísia Nasional Timor-Leste, liu-liu polisiamentu komunitária, Defensoria Públika no Provedoria dos Direitus Humanu no Justisa (PDHJ) no reprezentante sosiedade kona-ba mak NGO Belun.
Entretantu, Diretór Ezekutivu NGO Belun, Luis Ximenes hateten durante ne’e sira servisu hamutuk Diresaun Nasionál Prevensaun no Konflitu Komunitária no Defensoria Públika fasilita mediasaun no rezolusaun ba kazu sira la’ós krime iha komunidade.
“Normalmente mediasaun ne’e fasilita ba kazu sira ne’ebé la’ós krime. Maibé iha perspetiva husi lei na’in sira, iha kazu ne’ebé kmaan bele fasilita liuhusi mediasaun, tanba ne’e depende ba defensoria ka ida ne’ebé mak implementa lei.
Ami-nia esperiénsia ne’e ami fasilita ba disputa rai konflitu rai no problema sosiál sira hanesan kazu divorsiu, impresta osan la selu, animal tama toos no haksesuk malu,” nia hateten.
Nia hateten Ministériu Justisa mós dezenvolve ona lei mediasaun nian no matadalan sira atu gia rede inklui organizasaun seluk ne’ebé servisu fasilita mediasaun ba komunidade.
Iha parte seluk, Reprezentante UN Women, iha Timor-Leste, Nishtha Satyam hateten hahú tinan 2016, sira servisu hamutuk ho governu dezenvolve sistema no formasaun ba mediadór sira, kria matadalan nasionál ba mediasaun no mekanizmu sira atu ajuda rezolve konflitu ne’ebé akontese iha komunidade.
“Ohin primeira vez lansa rede nasionál ba mediasaun iha Timor-Leste, ne’ebé halibur mediadór sira hotu fó formasaun ba sira, kria mekanizmu jestaun konflitu, matadalan nasionál ba mediasaun ne’e sistema ida atu rezolve problema iha nivel komunidade. Ami kontente suporta Ministériu Interior no liña minstériu sira seluk lansa rede nasionál inklui fó formasaun ba mediadór feto sira iha baze,” nia hateten.
Nia hateten sira fó ona formasaun ba mediadór nasionál hamutuk na’in 56, sira iha komitmentu atu rekruta no fó formasaun ba mediadór hodi prense iha munisípiu sira hotu, mínimu ema na’in 6 kada munisípiu.