- Publika iha: 02 Outubro 2020
Ministerio Edukasaun Juventude no Desporto (MEJD) konstroi ona eskola 12, husi tota 32, ne’ebe hetan estragus husi dezastre naturais iha fulan janeiro to’o setembro 2020, iha munisipio Baucau, Viqueque, Lauten, no Manufahi.
Diretor Nasional Aksaun Sosial Eskolar (DNASE), MEJD, Joaquin Martins hateten, eskola 12 sira ne’e hetan estragos tanba anin bo’ot no husi inundasaun.
“Total eskola 32 ne’ebe afeta ba dezastre naturais ne’e iha apoio material no konstrui ona eskola 12. Falta 20 eskola mak seidauk apoio material hodi halo kontrusaun,” nia hateten.
Nia dehan, material konstrusaun ne'ebe mak governo apoio mak iklui ho ai, prego, kalen no ekipamento seluk tan ne'ebe mak konaba konstrusaun nian.
“Ita konstrui uluk eskola 12 ne’e tanba sira mak hetan estragos total liu,” DNASE Martins hateten.
Nia dehan, eskola 20 ne’ebe mak seidauk rezolve ne’e tanba la hetan estragos total, maibe presija halo rehabilitasaun deit, governo nafatin esforso makas ho parseiro sira oinsa atu bele rezolve.
Entretanto, Cordenador Rede Edukasaun Timor-Leste Coalition for Education (TLCE), Jose Monteiro hateten tuir levantamento dados ne’ebe mak sira halo, eskola ne’ebe husi inundasaun ne’e maioria ne’e be tama deit no laiha estragos total.
“Estragos total ne’e iha eskola tolu deit, ne’e governo presija halo konstrusaun foun. Sira seluk ne’e depois de inundasaun komunidade hamutuk ho dirizente eskola sira hamos kedan hodi funsional fali prosesu aprendisagem,” nia dehan.
Nia dehan, eskola ne’ebe mak afetado total, durante ne’e estudante sira eskola deit iha tenda ne’ebe mak komunidade sira halo hodi fasilita estudante no professores sira halo aktividade.
Nia haktuir, la’os deit eskola ne’ebe mak hetan estagos, maibe tenke halo mos rehabilitasaun ba eskola sira ne’ebe mak kondisaun la diak no fo amiasa ba vida estudante sira nune’e mos professor sira nian.
“Atu hadia kondisaun infrastrutura eskola nian, governo tenke investe orsamento, hodi kria kondisaun ne’ebe seguru ba estudante ho professor sira bainhira tempo udan sira sente seguro halo prosesu aprendisagem,” nia hateten.
Tanba ne’e nia husu ba governo serviso ho responsabilidade hodi rezolve lalais infraestrutura eskola nian nune’e bele rezolve fali problema seluk iha setor edukasaun.