Terça, Novembro 24, 2020
Total visitors: 536534

Diretor Eskola Sekundario Geral (ESG) Nobel da Paz, Pedro Nunes Menezes, hatete diresaun eskola nian kria ona sirkular interna eskola nian hodi bando estudante sira labele utiliza pasta ba eskola tanba, identifika ona estudante balun subar rama ambon no fatuk iha sira nia pasta laran.

Diretor Eskola Sekundario Geral (ESG) Nobel da Paz, Pedro Nunes Menezes, hatete diresaun eskola nian kria ona sirkular interna eskola nian hodi bando estudante sira labele utiliza pasta ba eskola.

Nia dehan, sirkular interna ne’e halo hodi evita estudante sira labele involve iha kazu krime no atu nune’e bele prepara ba sira nia futuru hodi bele sai lideransa diak.

“Ita nia estudante ne’ebe mak ita identifika subar rama ambon no fatuk iha pasta laran ne’e oras ne’e dadaun kazu tama ona iha tribunal no ita lakoi kazu ne’e akontese tan ba estudante sira seluk,” Diretor ESG Nobel da Paz Nunes hateten.

Nia dehan, liga ba kazu ne’e mak estrutura eskola nune’e mos inan aman sira halo enkontro hodi hasai sirkular ne’e hodi bando estudante sira mai eskola labele utiliza pasta.

“Sirkular ne’e la’os bando deit uza pasta ba eskola maibe bando mos uza jaket ba eskola,” nia hateten.

Tanba ne’e nia dehan, dadaun ne’e estudante sira ba eskola la utiliza ona pasta maibe utiliza deit pasta dokumento nian ne’ebe mak plastiku, mos ne’e hodi tau material eskola nian hanesan kaderno no lapijera.

Enkuanto nia dehan, total estudante iha eskola refere hamutuk 3,301 no professor hamutuk nain 73 permanente, kontratado hamutuk nain 50, no voluntario nain 27.

Entretanto Diretor Edukasaun Munisipio Dili, Ministerio Edukasaun Desportu no Juventude (MEDJ), Duarte Bragança hateten, karik kaer ona iha evidensia, depende ba eskola sira atu kria nia regulamento ka sirkular internu hodi regula estudante kada eskola sira.

“Regulamento sira ne’e normal atu bele miniza involvimento estudante iha aktu krime, maibe hau husu atu kria regras tenke kaer ba faktos, nune’e mos autorizasaun husi inan aman estudante,” nia hateten.

Diretor haktuir katak atu implementasaun regras ne’e professor sira aseita hotu inklui inan aman sira, nune’e la iha problema.

“Ita husu ba parte eskola tenke iha razaun ne’e mak fundamental ida ne’ebe mak ezizi duni estudante sira atu labele lori pasta tanba iha ona evidensia katak subar rama ambon iha pasta,” Diretor Bragança hateten.

Enkuanto nia dehan, karik eskola bando estudante sira labele lori pasta ba eskola, iha meios seluk ne’ebe mak estudante sira bele utiliza hodi asegura eskipamento eskola nian.

Iha parte seluk, Kordenador Rede Edukasaun Timor-Leste Coalition for Education (TLCE), Jose Monteiro hateten, inisiativa ne’ebe eskola iha hodi kuntribui ba kualidade no eduka disiplina estudante nian hodi hadok an husi hahalok krime, ne’e TLCE apoio.

“Inisiativa ne’e ita apoio tanba iha ona evidensia no kazu ne’e iha ona Polisia Servisu Investigasaun Sientifika hodi kuntinua prosesu ba tribunal,” Kordenador TLCE Monterio hateten.

Tanba ne’e nia dehan, atu labele akontese tan hahalok krime ne’ebe komete husi estudante sira, eskola iha direito atu kria regras interna ruma hodi regula estudante iha oras eskola, fora husi ne’e kompetensia inan aman sira nian ona.

“Ita husu mos ba inan aman atu tau atensaun masimo no responsabilidade hodi eduka sira nia oan atu labele komete aktu krime,” Kordenador TLCE Monteiro salienta.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04