Komisaun F Husu MEJD Rekruta Professor Kontratado 5302 Sai Permanente

Komisaun F trata astuntu edukasaun iha Parlamento Nasional husu Ministerio Edukasaun Juventude no Desporto (MEJD) rekruta professor kontratado nain 5302 ba permanente tanba professor ne’ebe mak hanorin iha eskola maioria kontratado.

Prezidente Komisaun F, Antonio Verdial hateten, eskola sira ne’ebe mak komisaun F halo vizita ba komposto husi pre-eskolar to’o ensinu sekundario iha Timor-Leste laran maioria aprezenta probleman katak professor sira ne’ebe mak hanorin iha eskola balun tinan 15 balun 20 anos ona maibe sira nia presensa ne’e la konsidera hanesan permanente.

“Komisaun F ita husu ba Ministerio Edukasaun Juventude no Desporto tenke rekruta tan professor kontratado hamutuk 5302 ba professores permanente iha tinan 2021,” Prezidente Komisaun F Verdial hateten.

Tanba ne’e nia dehan, governo tenke konsidera no tau iha orsamento jeral do estado 2021 hodi responde ba problema sira ne’ebe mak parlamento foti ona.

Alende ne’e nia mos husu MEJD atu halo koperasaun ho Komisaun Funsaun Publiku (KPF) atu bele rekruta professor kontratado hira refere sai ba funsionario publiku.

Iha fatin hanesan, Vise Ministro MEJD, Antonio Guterres hateten, tuir plano governo nia ba Orsamento Jeral do Estado (OJE) tinan 2021 nian atu rekruta tan professor kontratado ba permanente hamutuk 975.

“Husi numero total professor ne’ebe ita atu rekruta ne’e bazeia dadus ne’ebe mak husi parte eskola oferese nune’e mos ekipa sei tun direta tan hodi identifika professor sira ne’ebe mak merese hodi rekruta ba permanente,” Vise MEJD Guterres hateten.

Nia informa tan katak professores kontratado sira ne’ebe mak atu rekruta ba permanente tenke hanorin iha eskola refere hahu husi tinan 2003 mai to’o ohin loron nune’e mos la abandona serviso, no ba professores kontratado huhu husi 2015 governo seidauk bele rekruta ba permanente.

“Professores kontratado 975 ne’ebe mak ita iha, professor sira ne’e mak hala’o knar hanesan professor kontratado hahu husi tinan 2003 mai to’o ohin loron nune’e mos labandona sira nia serviso no kontribui tebes ba dezenvolvimento esdukasaun,” nia informa.

Nia dehan, antes atu halo rekrutamentu ba professor hirak ne’e MEJD sei iha uluk komunikasaun ho KFP.