Ensinu Superior Publiku Deside Ona Simu Estudante Foun 4320

Ensinu Superior Publiku unklui Universidade Nasional Timor-Loro sa’e (UNTL) no Instituto Politekniku Betano (IPB) deside ona simu estudante foun ba no letivo tinan 2021 hamutuk nain 4320 hodi prense vaga ne’ebe mak prepara ona.

Ministro Ministerio Ensino Superior Siensia no Kultura (MESSK) Longuinhos do Santos hateten, numero total ne’ebe mak ensinu superior publiku sira deside ona ne’e aplika ba rejime jeral no especial, hakbit, no rejime ba veteranus.

“Ba rejime jeral ita ofrese vaga no 70%, rejime especial 30%, rejime hakbit ita oferese 500 no rejime ba veteranus nia ona sira iha 650,” Ministro MESSK Santos hateten.

Nia dehan, husi numero hirak ne’e mak deside husi instituisaun ensinu superior publiku rua ne’ebe mak eziste iha Timor-Leste hodi oferese vaga hamutuk 4320 ba estudate foun hodi asesu iha tinan 2021.

“Rejime jeral ita oferese ba estudante finalista iha tinan 2020, rejime espesial ita oferese ba instituisaun Falintil Forsa Defesa Timor-Leste (F-FDTL) no Polisia Nasional Timor-Leste (PNTL) nune’e mos ba ita nia maluk difisiente sira,” nia informa.

Enkuanto nia dehan, ba rejime hirak ne’e Ministerio Ensinu Superior Siensia no Kultura (MESSK) deside ona data teste ba estudante sira hahu husi dia 23 to’o 25 fulan Novembro iha esdifisio edukasaun kada munisipio.

Entretanto, Prezidente IPB, Acacio Cardoso hateten, iha tinan 2021 ne’e IPB deside ona simu estudante foun husi sekundario jeral no tekniku vokasional hamutuk nain 300.

“Kada tinan ita sempre koko hodi hasa’e numero estudante ne’ebe mak atu asesu ba Instituto Politekniku Betano (IBP) iha tinan kotuk ita simu 240 deit maibe tinan 2021 ne’e ita simu 300 vaga,” nia hateten.

Tanba ne’e nia dehan, iha tinan 2021 ne’e IPB koko simu estudante foun to’o 300 atu nune’e bele hetan ne’etik metade husi numero ne’ebe mak determina ona.

Iha parte seluk Kordenador Rede Edukasaun Timor-Leste Coalition for Education (TLCE) Jose Monterio hateten, ensinu superior publiku ne’e fasilita tebes povu nia ona sira bele aprende ba liu-liu liga ho propinas.

“Ita hare ba total numero ne’ebe mak diside ona ne’e ita husu governo atu bele hare no resolve falisidade sira ne’ebe mak UNTL sei menus nune’e mos ranpa ba ita nia maluk difidiente sira,” nia hateten.

Tanba ne’e nia dehan, antes atu simu estudante foun tenke kompleta uluk fasilidade sira ne’e mak bele simu tan estudante foun.