Lidera UNTL Tenke Figura Ne’ebe Meritu Ba Area Edukasaun

Kordenador Rede Edukasaun Timor-Leste Coalition for Education TLCE, Jose Monteiro hateten, relasiona ho mandanto Reitor Autal Universidade Nasional Timor-Lorosa’e (UNTL) ne’ebe sei remata iha tempo besik no se deit mak troka hodi lidera fali UNTL tenke iha meritu ba area edukasaun nian.

Nia dehan, area edukasaun liu-liu nivel ensinu superior ne’e tenke koloka figura ne’ebe mak iha konhesimento diak no hatene halo negosiasaun internasional sira hodi apoio iha rekursu humanus nune’e mos fasilidade sira.

“Reitor atual nia mandanto sei termina iha tempo besik, ita husu governo tenke koloka figura ne’ebe mak meritu no konhesimento diak iha area edukasaun liu-liu ensinu superior,” TLCE Monteiro hateten.

Nia dehan, Reitor foun ne’e labele foti husi instituisaun seluk karik bele foti husi UNTL rasik tanba sira mak hatene diak liu tan oinsa atu bele dezenvolve no hadia kualidade diak liu tan ba UNTL iha futuru.

Enkuanto Reitor atual hahu nia mandato iha tinan 2016 to’o 2021 sei termina no sei intrega fali kargo ba ema seluk.

“Ita nafatin sujere tenke koloka ema ne’ebe iha abilidade no kapasidade diak hodi lidera no hadia kualidade edukasaun iha nivel ensinu superior,” nia sujere.

Entretanto, Reitor atual UNTL Francisco Miguel Martins hateten, Konseilho Jeral UNTL iha ona plano hodi halo eleisaun ba kandidado nain 4 hodi lidera UNTL ba tinan 2021-2026 nian.

“Reitor foun ne’e ita sei la foti diretamente maibe ita loke vaga no dadaun ne’e iha kandidato nain 4 mak mai intrega ona sira nia dokumento hodi halo eleisaun hodi determina se mak bele lidera,” nia hateten.

Nia dehan, husi kandidato nain 4 ne’e tolu husi UNTL rasik no nain ida husi Intituisaun seluk.

“Husi kandidato nain 4 ne’e, konselho jeral UNTL sei elemina tiha nain ida no mantein nain tolu hodi hakat ba eleisaun ne’ebe sei hala’o,” nia informa.

Enkuanto nia dehan, kandidato nain 4 ne’e sira iha konhesimento diak iha area edukasaun nian tanba durante ne’e sira mos kuntribui ba dezenvolvimento iha Universidade Nasional Timor-Lorosa’e rasik.

“Tanba ne’e ita la duvida ho sira nia kapasidade hodi lidera Universidade Nasional Timor-Lorosa’e (UNTL) iha futuru,” nia informa.