Komando Dili Implementa Programa Polisia Ba Eskola

Polisia Komando Munisipio Dili implementa programa polisia ba eskola hodi halo prevensaun ba krime no asidente sira ne’ebe komete husi estudante sira iha Dili laran.

Komandante Polisia Munisipio Dili, Superientendente Xefe Henrique da Costa hateten, implementasaun programa polisia ba eskola ne’e objetivo hodi halo sosializasaun lei arma branka no kodigo estrada ba estudante kada eskola hodi halo prevensaun ba konflito.

“Kazu krime sira ne’ebe durante ne’e ita rejisto maioria komete husi estudante sira, la’os joven,” Komandante Costa dehan.

Alende ne’e nia dehan, konaba asidente sira mos maioria husi labarik minoridade tanba sira seidauk komprende didiak konaba funsionamento sinais tranzito iha dalan publiku.

“Tanba ne’e mak ita kopera ho parte eskola sira iha Dili laran hodi implemeta programa polisia ba eskola nune’e bele halo sosializasaun besik liu ba estudante sira konaba lei arma branka no kodigo estrada nune’e bele redus kazu krime no asidente,” nia informa.

Nia dehan, programa ne’ebe komando Dili implementa halo hodi kuntribui ba sidade Dili sai sidade ne’ebe mak seguru no livre husi konflito.

Iha fatin hanesan, Diretor Eskola Sekundario Jeral Sagrado Coracao de Jesus Becora Domingos Godinho hateten, plano hotu ne’ebe mak polisia halo ne’e kontribui tebes ba prevensaun konflito iha eskola liu-liu estudante sira.

“Kada eskola alunus barak no mai ho karakter ne’ebe mak la hanesan, balun iha hanoin diak, balun iha hanoin problematiku tanba ne’e implementasaun ne’e importante tebes hodi muda karakter esturante sira nian husi konflito nune’e hodi prepara ba sira nia futuru,” Diretor Eskola Godinho dehan.

Nia dehan, implementasaun ne’e momento ne’ebe diak tebes ba serviso hamutuk entre eskola ho polisia hodi sensibilizasaun hodi halo prevensaun ba konflito hodi forma sidade sai hakmatek.

Tanba ne’e nia husu mos ba parte polisia bainhira iha horas eskola nian mak hetan estudante balun la’o uza farda iha jardim sira iha Dili laran husu atu halo kapturasaun hodi mai intrega iha eskola depois eskola sei bolu inan aman.