- Publika iha: 25 Fevereiro 2021
Rede Edukasaun Timor-Leste Coalition for Education (TLCE) husu Ministeriu Edukasaun Juventude no Desportu (MEJD) atu fornese livru ba eskola area fronteriza Covalima no Bobonaro hodi fasilita estudante sira aprende iha uma durante eskola suspende.
Kordenador TLCE, Jose Monteiro, hateten eskola sira iha munisipio rua ne’ebe mak suspende meios seluk ne’ebe mak fasilita duni estudante sira iha uma mak livro tanba Programa Eskola Ba Uma ne’e la kuntribui liu-liu iha fronteira.
“Ita husu ba Ministerio Edukasaun Juventude no Desportu eskola iha munisipio Bobanaro no Covalima ne’ebe mak oras ne’e dadaun suspende diak liu ofrese livru deit hodi tulun estudante aprende iha uma,” TLCE Monteiro hateten.
Nia dehan, dadaun ne’e eskola iha munisipiu rua deit mak suspende tanba ne’e livro ne’ebe ministeriu iha bele sufsiente hodi distribui ba estudante sira.
“Distribui livru ne’e diak liu fali programa eskola ba uma tanba iha livru laran iha texto nune’e mos exersisiu sira estudante sira bele halo rasik, maibe aprende via televizaun ho radiu ne’e estudante balun nia familia la iha TV ho Radiu,” nia informa.
Entretanto, Diretora Jeral MEJD, Odelia Das Dores Martins hateten, liga ba despaxu ne’ebe mak ministeriu hasai husi suspende eskola iha munisipio rua ne’e, ministerio mos iha ona hanoin hodi halo distribuisaun livru ba estudante sira hodi bele estuda iha uma durante prosesu aprendisagem iha eskola paradu.
“Husi Ministeriu fo ona autorizasaun ba diretor eskola iha munisipiu rua ne’e atu distribui hotu livru ne’ebe mak rai hela iha bibloteka eskola nian ba estudante sira depois ministeriu sei kompleta fali,” DJ MEJD Martins dehan.
Tanba ne’e nia dehan, dadaun ne’e husi parte eskola halo ona distribuisaun livru ba estudante sira hodi bele aprende iha uma.
“Maibe livru ne’e ita distribui prioridade liu ba eskola sira iha area rurais tanba sira la iha internet ne’ebe mak diak no balun ne’ebe mak la iha televizaun no radiu ka telefone hodi fasilita sira akompanha programa eskola ba uma,” nia informa.
Alende ne’e nia dehan, livru iha armagen atu fasilita estudante sira ne’e sufsiente hela, maibe ministeriu atu lori ba ladiak tanba dalan ba munisipiu rua ne’e la autoriza movimentu.