- Publika iha: 25 Fevereiro 2021
Governu liu husi Ministerio Edukasaun Juventude no Desportu (MEJD) hapara ona implementasaun projetu lian materna iha eskola tanba durante implementasaun seidauk halo avaliasaun hodi hatene progresu husi implementasaun ne’e rasik.
Ministro MEJD, Armindo Maia hateten, konaba implementasaun projeto lian materna iha munisipiu Lautem, Manatutu, no Rejiaun Administrativa Espesial Oe-Cusse Ambeno (RAEOA) durante ne’e seidauk halo avaliasaun.
“Tanba ne’e durante implementasaun projetu lian materna ne’e Ministeriu Edukasaun Juventude no Desportu (MEJD) seidauk hatene nia progresu ne’e oinsa iha duni benefisiu ka lae,” nia hateten.
Nia dehan, dadaun ne’e seidauk iha referensia ruma hatudu katak implementasaun ne’e diak no ministeriu mos deside ona katak hapara implementasaun lian maternal iha eskola.
“Implementasaun lian materna governu foti ona desizaun hodi hapara hanorin estudante sira ho lian materna iha eskola publiku hotu iha Timor-Leste,” nia salienta.
Tanba ne’e nia dehan, depois de halo tiha avaliasaun ho sai ona referensia ho hatudu progresu diak mak sei implementa tan ba munisipiu seluk maibe, dadaun ne’e governu hapara hela implementasaun.
Entretantu, Kordenador Rede Edukasaun Timor-Leste Coalition for Education (TLCE), Jose Monterio, hateten lian materna ne’e sei la fo benefisiu, tanba lian materna la merese atu uza hodi hanorin estudante tanba lia-fuan balun ladun diak.
“Antes iha implementasaun ne’e ami TLCE mos la konkorda atu implementa lian maternal hodi hanorin estudante iha eskola tanba la fo benefisiu ba estudante iha prosesu aprendisagem,” nia hateten.
Nia dehan, TLCE konkorda ho desizaun MEJD nian katak hapara implementasaun lian materna iha eskola sira.
“Iha eskola ne’e implementa mak lian ofisial no nasional tuir ita nia konstituisaun RDTL hakerek ona tanba lian rua ne’e mak uza iha eskola no serviso nune’e mos merkadu laos lian materna,” TLCE Monteiro dehan.
Tanba ne’e nia dehan, lian materna ne’e la merese implementa iha eskola hodi hanorin estudante sira no TLCE apoiu100% hapara implementasaun projetu lian materna.