Komunidade Akademika Nain 3,000 Simu Ona Vasina Covid-19

Diretor Nasional Saúde na Familia (SnF), iha Minsiterio da Saúde, Vitor Soares Martins hateten komunidade akademika, kompostu husi estudantes, manorin, dosente inklui funsionario iha munisipio Dili, kuaze 3,000 resin maka simu ona vasina Covid-19 tipu Sinovac dose dahuluk.

Nia dehan inisio lansamentu indika eskola universitario tolu ba postu vasinasaun hanesan Universidade Nasional Timor-Leste (UNTL), universidade DIT, universidade IOB. No sira halo apoximasaun ba universidade sira hodi loke tan postu iha universidade UNPAZ no Institutu Superior Cristal atu hasa’e kobertura tanba komunidade akademika sira no komunidade Chineza sira maka alvu ba kampanha vasinasaun Sinovac.

“Entusiasmu husi estruktura ensino superior sira nian, ita hahu iha UNTL, UNPAZ, DIT no seluk tan, ne’ebe komunidade akademika nain 3,000 resin maka ami fo ona vasina,” nia hateten hafoin partisipa iha abertura vasina iha fatin vasinasaun iha Institutu Superior Cristal, Dili.

Nia dehan kampanha vasinasaun Sinovac dadaun ne’e konsentra deit ba iha komunidade akademika sira iha munisipio Dili, hanesan asaun ida atu bele re-ativa fali aulas prejensiais tanba kuaze tinan ida resin aula prejensiais suspende.

Iha parte seluk, Presidente Executivu Fundação Cristal, Agostinho dos Santos Gonsalves hateten informasaun ne’ebe sira simu katak bainhira profesores, dosente no estudante sira ho idade tinan 18 leten barak vasina ona tanba ne’e sira fo espasu ba ekipa saúde fo vasina ba estudante no profesores sira.

“Ita hare iha media sosial halo tauk ema barak, maibe ba ami atu mai iha ne’e tenke hatudu kartaun tanba ita lakohi ema ida rua kontamina ba ema seluk, ne’e hau hanoin labele,” nia hateten.

Nia dehan vasina ne’e la obrigatoriu, maibe profesores, dosente no funsionario sira ne’ebe la vasina diak liu hela iha uma husik sira ne’ebe vasina ona maka tama hanorin estudante sira.

Nia hateten atu asegura kualidade edukasaun hodi garantia rekursu humanu ne’ebe kualifikadu maka ensino sekundario no ensino superior sira tantu publiku no privado tenke kopera hodi hada’e kobertura vasinasaun Covid-19.