- Publika iha: 25 Agosto 2021
Ministeriu Edukasaun Juventude no Desportu (MEJD) implementa Programa Konstrusaun no Rehalititasaun Infraestrutura Edukativa (PKRIE) ba eskola 16 ne'e mak identifikasi kondisaun at iha kapital Dili.
Vise Ministru Edukasaun Juventude no Desportu (MEJD), Antonio Guterres, hateten programa PKRIE ne'e husi politika VIII Governu nian hodi responde no dezelvolve setor edukasaun ne'ebe mak sei kondisaun la diak iha Timor.
"Husi programa kontrusaun no rehabilitasaun infrastrutura edukativa ne'e ita implementa ba eskola hamutuk 221 ne'eba aprova husi Parlamentu Nasional, maibe ita deside uluk implementa ba eskola 16 ne'ebe mak identifikadu iha kapital Dili," Vise MEJD Guterres hateten iha Vila-Verde.
Nia dehan, dadaun ne'e hahu implementa ona PKRIE iha eskola ensinu baziku Marinir, Fatu-Meta, Akanunu, Sekundariu Jeral 4 de Setembru, 5 de Maiu no seluk tan ne'e hahu halo kontrusaun no balu rehabilitasaun deit.
"Ita finaliza tiha eskola 16 iha Dili ne'e mak ita kuntinua fali ba eskola hamutuk 169 iha munisipiu seluk ne'e ita identifika ona kondisaun la diak," nia salienta.
Entretantu, Diretor Nasional Infraestrutura iha MEJD, Helio Lopes, dehan prosesu konstrusaun no rehabilitasaun ba eskola 221 hahu husi Pre-Eskolar to'o Sekundariu Jeral no Tekniku ne'ebe eziste iha nivel nasional.
"Husi numeru total ne'e maioria iha novel ensinu baziku tanba ita hare iha teritoriu laran ne'e eskola ensinu baziku maioria kondisaun la diak,"Diretor Infraestrutura Lopes hateten iha knar fatin.
Nia informa tan katak husi prosesu kontrusaun no rehabilitasaun eskola 221 ne'e sei aumetan sala de aula hamutuk 680 no kompleta bioblioteka, no sala professor, tinan ida ne'e la remata kuntinua fali iha tinan oin.
Iha parte seluk Kordenador Rede Edukasaun Timor-Leste Coalition for Education TLCE Jose Monterio hateten, konaba programa Konstrusaun Rehabilitasaun eskola hirak ne'ebe mak identifikadu ona ne'e 100% sosiadade sivil konkorda.
"Programa infrastrutura eskola kompleta no sanimentu baziku sira ne'e kada tinan TLCE sempre rekomenda ba governu liu husi Ministeriu Edukasaun Juventude no Desportu (MEJD) atu bele tau iha prioridade no ikus mai rezultadu pozitivu ona katak governu bele hahu rezolve ona," Kordenador TLCE Monteiro hateten.
Maibe nia dehan, governu gasta osan bo'ot ba konstrusaun eskola sira tenke iha kualidade diak nune'e bele utiliza iha tempu naruk, labele uza tinan ida ka rua deit at ona ne'e labele akontese tan.