- Publika iha: 03 Setembro 2021
Diresaun Nasional Promosaun Direitu ba Ema Difisiensia (DNPDED), iha Ministeriu Solidaridade Sosial no Inkluzaun (MSSI), husu Ministeriu Ensinu Superior Siensia no Kultura (MESSK) atu fo prioridade ba ema ho kondisaun difisiensia hodi asesu ba edukasaun nivel universidade nian.
Diretor DNPDED, Mateus da Silva hateten, ema hotu iha direitu asesu ba edukasaun tantu ho kondisaun normal no difisiensia, tanba ne'e tenke fo prioridade difisiente sira ne'ebe mak remata ona sekundariu maibe la iha oportunidade asesu ba universidade.
"Ita iha estudante difisiente barak mak rematan ona nivel sekundariu maibe la kuntinua iha nivel superior," nia dehan.
Nia dehan, sira ne'ebe asesu ba universidade ne'e iha 19 deit, maioria la kuntinua no iha hela komunidade nian leet.
"Tanba ne'e ita husu ba Ministeriu Ensinu Superior Siensia no Kultura (MESSK) tenke kria politika ida hodi fasilida ema ho difisiensia asesu ba universidade publiku tantu pribadi nune'e labele mosu diskriminasaun mak ita nia sidadaun," Diretor DNPDED Silva hateten.
Alende ne'e husu MESSK atu servisu hamutuk ho Ministerio Estatal no autoridade lokal hodi halo identifikasaun ba ema ho difisiente sira iha suku laran nune'e hodi fasilita asesu ba ensinu superior.
"Ita nia estudante difisiente sira ne'e barak abilidade diak liu ema normal maibe, la iha dalan atu asesu ba universitaria," nia saliente.
Iha parte seluk Ministru Ensinu Superior Siensia no Kultura (MESSK) Longuinhos dos Santos hateten, durante iha duni programa ajuda maluk ho difisiente asesu ba nivel ensinu superior liu-liu iha Universidade Nasional Timor-Lorosa'e (UNTL) maibe ne'e minimu liu.
"Hanoin sira ne'ebe mak instituisaun relevante sira hato'o ne'e ami simu, nune'e mos nafatin esforsu hodi buka meios oinsa bele fasilita ita nia maluk difisiente sira ne'ebe mak finiza ona estudu iha sekundariu no hakarak kuntinua," Ministru Santos informa.
Nia hateten, atu kria politika hodi rezolve situasaun ne'e linha ministeriu sira tenke tur hamutuk hodi tau hamutuk ideia hodi kria politika ne'ebe pozitivu hodi tulun maluk difisiensia asesu ba iha nivel ensinu superior.