MEJD LaIha Estatuto Rekrutamento Ba Prorfessor Kontratado

Ministro Ministerio Edukasaun Juventude no Desporto (MEJD) hateten katak seidauk iha estatuto espesifiku ida konaba rekrutamento professor kontratado nain 2.203 ne’ebe sei hein hela atu bele sai permanente.

Ministro haktuir tan katak professor kontratado hirak ne’e balun hanorin iha eskola kuaze tinan 20 liu ona maibe MEJD la iha kompetensia atu rekruta ba permanente tanba la iha estatuto.

“Bainhira atu rekruta professor kontratado ba permanente la’os ita nian kompetensia mesak maibe tenke presija deskuti hamutuk ho Komisaun Funsaun Publika (KFP) hodi kria estatuto professor kontratado, depois mak ita halo rekrutamento ba permanente,” MEJD Maia dehan.

Tanba ne’e nia dehan, dadaun ne’e ministerio esforsu hela komunika ho KFP hodi kria estatuto ida ne’ebe fo dalan hodi halo rekrutamento ba professor kontratado sira ba professor permanente.

“Estatuto ne’e ita sei lori ba aprezenta iha Konselhu Ministro hodi hetan aprovasaun, depois ita sei rekruta uluk professor kontratado hamutuk 300 ba permanente,” nia informa.

Entretanto, Prezidente Komisaun G, trata astuntu Edukasaun Kultura ho Sidadania iha Parlamento Nasional, Deputado Antonio Verdial hateten, MEJD tenke rekruta professor kontratado 2.203 ne’e ba permanente.

“Ita nia professor kontratado hirak ne’ebe mak didika sira nia an tomak hodi kuntribui ba dezenvolvimento edukasaun iha Timor, tanba ne’e ita husu governu valoriza ho muda sira nia estatus kontratado ne’e ba permanente,” nia hateten.

Tanba ne’e nia dehan, professor hotu ne’ebe mak hanorin iha eskola hahu husi pre-eskolar to’o sekundario ne’e maioria kontratado, permanente ne’e sura ho liman fuan deit.

“Professor kontratado hirak ne’e balun hanorin iha eskola tinan 15 ba to’o 20 anos maibe sira nia presensa la konsidera hanesan permanente,” Prezidente Komisaun G Verdial dehan.

Nia dehan, eskola hotu ne’ebe mak komisaun G vizita ne’e mairoria aprezenta problema katak professor kontratado sira ne’e kuntribui iha area edukasaun tinan barak ona tanba saida mak nafatin kontratado, no husu governo iha kompetensia hodi rezolve ida ne’e.