- Publika iha: 22 Junho 2022
Ministerio Edukasaun Juventude no Desporto (MEJD) hari ona sentru hamutuk 170 hodi implementa programa Halimar Aprende no Deskobre Susesu (HANDS) ba eskola sira ensinu pre-eskolar (EPE) hamutuk 400 iha Timor-Leste.
Kordenador Programa HANDS, Pedro Ximenes hateten programa refere MEJD kria hodi fasilita labarik sira hahu husi tinan 3 to'o 5 bele asesu diak liu tan ba ensinu pre-eskolar.
Nia dehan, sentru 170 ne'ebe mak MEJD hari ne'e hetan apoiu orsamentu husi governu Nova-Zelandia ho monatante 10 milhoens dolares amerikanu.
"Ita hari sentru 170 ne'e ba ensinu per-eskolar hamutuk 400 nune'e hodi implementa programa HANDS ne'e tanba ita hatene katak edukasaun pre-eskolar ne'e la obrigatoriu. Politika implementasaun programa ida ne'e atu bele apoiu labarik sira bele tama pre-eskolar hodi prepara molok hakat ba ensinu baziku," Kordenador Programa HANDS Ximenes hateten iha ETDA, iha Dili.
Nia dehan, MEJD kria programa HANDS atu aselera prosesu dezenvolvimentu labarik, tanba tuir planu ministeriu to’o 2030, numeru labarik ne’ebe asesu ba EPE tenke atinje 30%.
"Tuir dadus ne'ebe ita rejista iha programa HANDS, numeru matrikula ba labarik sira tama ona iha EPE hamutuk 25 to’o 27%, no sira ne’ebe seidauk tama hamutuk 75%, espera katak liu husi programa ne'e bele apoiu labarik sira asesu ba Ensinu Pre-Eskolar," nia informa.
Nia dehan, EPE eziste iha territoriu laran iha modelu rua, ida rejista iha ministeriu ne’ebe konsidera nu’udar publiku no seluk privadu, no tuir dadus ne’ebe HANDS rekolla, ensinu pre-eskolar ne'ebe eziste hamutuk 400 resin no total labarik iha ensinu hamutuk 30.000 to’o 35.000.
Programa HANDS nos suporta formasaun ba profesor sira, hodi prepara sira nia mentalidade hodi hanorin labarik sira.
"Kriasaun ba fatin halimar labarik sira ne'e MEJD serbisu hamutuk ho Programa Nasional Dezenvolvimentu Suku (PNDS) hodi harii fatin halimar ba labarik sira. Dadaun ne'e finaliza ona 170, falta 200 mak seidauk konkliu” nia haktuir.
Nia dehan, sentro HANDS hirak ne'e kompleta ho fasilidade halimar nian no besik kedan iha eskola no labarik sira bele halo aktividade diaria.
Entretanto, Diretora Ensinu Pre-Eskolar Katolika Nossa Senhora de Ai-Tara Soibada, Madre Alzira de Jesus hateten, EPE ne'e foin primeira eziste iha Soibada iha tinan kotuk no inan aman barak mak lori sira nia oan ba aprende iha pre-eskolar refere.
"Ami sei esforsu nafatin atu eduka labarik sira hahu husi tinan 3 to'o tinan 5 iha pre-eskolar durante tinan tolu molok hakat ba ensinu baziku," niae informa.