UNICEF Oferese Livru Defisiénsia Miliaun 2 Ba MEJD

United Nations International Children’s Fund (UNICEF) oferese livru topiku defisiénsia miliaun rua (2) ba Ministériu Edukasaun Juventude no Desportu (MEJD) hodi distribui ba estudante pre-eskolér sira hodi fasilita prosesu aprendisajen iha eskola.

Ministro MEJD Armindo Maia dehan livru topiku defisiénsia refere, inklui livru ezersísiu no livru hirak ne’e sei distribui ba estudante pre-eskolar sira kada estudante ida.

“Livru miliaun 2 ne’ebé mak UNICEF oferese mai MEJD ne’e ita konsidera barak tebes tanba kompara ho ita-nia estudante pre-eskolár iha de’it rihun 400,” Ministru MEJD Maia dehan iha Armajen Ariana iha Bairu-Pite, Dili.

Nia dehan, ho númeru livru ne’e barak tebes, tanba ne’e MEJD deside ona katak kada estudante sei hetan livru (5) lima no sei uza iha pre-eskolár to’o ensinu báziku.

“Husu ba eskola sira tenke distribui ba estudante sira nune’e bele fasilita sira iha ensinu aprendisajen labele tau de’it iha armajen,” nia saliente.

Nia dehan, livru hirak ne’e entrega ba eskola hotu iha territóriu laran hahú husi pre-eskolár to’o ensinu báziku sira.

Iha fatin hanesan, Reprezentante UNICEF iha Timor-Leste, Bilal Aurang Zeb Durrani, hateten livru millaun 2 ne’ebé oferese ne’e atu bele distribui ba eskola pre-eskolár no ensinu báziku sira.

“Livru ne’ebé mak UNICEF entrega ona ba MEJD ne’e kompostu husi livru historia, livru ba atividade, livru ezersisiu ba labarik pre-eskolár sira to’o ensinu báziku, inklui giaun ba profesór sira hodi apoia melhoramentu sira-nia koñesimentu jerál no bele uza hanesan instrumentu husi hanorin no hadia aprendisajen ba labarik sira,” nia dehan.

Nia dehan,UNICEF konsidera edukasaun importante tanba ne’e tenke esforsu hodi aselera krije aprendisajenliuhusi alfabetizasaun iha Timor-Leste, nune’e mós husu ba MEJD tenke promove hadomi lee livru ba estudante sira liuhusi dezenvolvimentu kultura lee nian.