- Publika iha: 13 Janeiro 2023
Rede Timor-Leste Coalition for Education (TLCE) nafatin ezije Ministeriu Edukasaun Juventude no Desportu (MEJD) atu halo rekrutamentu ba profesór kontratadu sira ba permanente, tanba durante ne’e sira kuntribui ona ba dezenvolvimentu edukasaun iha Timor-Leste.
Koordenadór TLCE, Jose Monteiro, dehan profesór kontratadu hirak ne’e kona-ba esperiénsia tranzmite siénsia ba estudante sira, ne’e la duvida ona ba sira-nia kapasidade, tanba ne’e MEJD obrigatoriomente tenke muda sira-nia estatutu kontratadu ba permanente.
“Ita-nia profesór hirak ne’e nafatin no estatutu kontradatu, tanba ne’e rede edukasaun Timor-Leste Coalition for Education husu Ministériu Edukasaun Juventude no Desportu tenke halo rekrutamentu ba profesór kontratadu ba permanente,” nia dehan.
Nia dehan, profesór kontratadu hirak ne’e balun hanorin kuaze tinan 15 ba leten ona, maibé governu seidauk muda sira-nia estatutu ba permanente, maské sira balun nia esperiénsia hanorin di’ak liu profesór permanente.
Alende ne’e nia dehan, iha tinan 2021 MEJD promete ona atu halo rekrutamentu ba profesór kontratadu ba permanete maibé to’o agora seidauk realiza no la esplika tanba saida.
Nia hatete, profesór hirak ne’e la persiza tan halo teste maibé, haree de’it husi sira-nia prezensa iha eskola no monitorizasaun ne’ebé durante ne’e ekipa halo.
Entretantu, Diretór Jerál MEJD, Antoninho Pires, dehan MEJD prepara ona vaga hamutuk 2.799 ba profesór kontratadu hamutuk 2.111 hodi bele priense nune’e bele muda sira-nia estatutu ba permanente.
“Profesór kontratadu 2.111 ne’e ita rekolla husi sira ne’ebé hahú hanorin iha eskola husi tinan 2003 mai to’o 2018, sira mak iha direitu hodi prense ba vaga 2.799 ne’e,” nia dehan.
Nia dehan, profesór hirak ne’e la halo ona teste, tanba bazeia de’it ba sira-nia esperiénsia no kontribuisaun durante ne’e.
“Tanba ne’e ita halo ona rekapitulasaun ba profesór hirak ne’ebé selesionadu ba vaga 2.799 ne’e hodi husik hela estatutu kontratadu hodi simu fali estatutu permanente,” DG MEJD Pires dehan.
Nia dehan, profesór hirak ne’e merese duni sai permanente, alende ne’e agradese mós ba organizasaun non-governamentál hanesan Timor-Leste Coalition for Education ne’ebé durante ne’e mós kontribui dadus ba MEJD hodi bele rekruta profesór kontratadu ba permanente.